Эсон-омон бир амаллаб кўкламга ҳам етиб олдик. Охирги йилларда аҳолида табиат қўйнида дам олиш маданияти шаклланиб бормоқда. Яқин кунларда пикник сезони бошланади, ёппасига Паркентга борилади. Кўк сомса, шашлик-машлик дегандек!
Аслида, Паркентнинг туризм салоҳияти Бўстонлиқникидан анча юқори. Аммо инфратузилма ҳали мақташга арзигулик эмас. Ҳозир у ерда маҳаллий аҳоли ва сайёҳлар учун қулай шароитлар яратиш мақсадида катта ишлар бошланган.
Паркентликларнинг айтишича, охирги уч ойда Бош вазир ҳар ҳафта шахсан ўзи ташриф буюриб, амалга оширилаётган ишларга бош-қош бўляпти экан. Давлат раҳбаридан қатъий команда бўлган, шекилли.
Қизиқ бир воқеани ҳам айтиб қолишди: Паркент тоғларида Олтинбел деган кичкина водий боракан. У ерга ҳар йили қишда МДҲ давлатларидан чанғи учиш учун спортчилар келаркан. Тоғ-чанғи спорти учун табиий майдон экан. Бош вазир ҳам қишда шу ерни ўрганишга борган, қайтишда машинаси қорга ботиб қолиб, бошқа машина уни тортиб чиқарибди. Демак, сайёҳларга қулайлик яратиш бўйича керакли хулосалар пайдо бўлган.
Паркент тоғлари нафақат баҳорда ҳордиқ чиқариш, балки ёзнинг иссиғидан қочиб, салқин ҳавода дам олиш учун ҳам ажойиб жой. Фақат одамларга қулай шароит яратиб берилса бўлгани. Бўстонлиқ эса ёзда одамлар билан лиқ тўлади, қадам қўйишга жой қолмайди.
Ҳукумат раҳбари Паркентни Бўстонлиққа рақобатчи дам олиш ҳудудига айлантириш мақсадида арзон ва қулай зоналар ташкил этишга жиддий киришгани, албатта, ижобий қадам.
@mufasa_mh
