السلام عليكم
اخواتي أهل الثانوية العامة، النتيجة خلاص بانت؟
لما انا كنت في نفس اللحظة اللي انتوا فيها دي انا اتكتمت مكاني ومانطقتش، مكنتش حاسس بحاجة، يعني ايه واحد في علمي علوم يجيب ٩٢%! ايه المجموع الوحش ده؟
بس كان قدامي طريقين يا صديقي، يا اما اشرب سجاير واصيع مع اللي صاعوا، يا الطريق التاني اللي بفضل الله وحده ربنا وداني له، كان فيه ناس اكبر مني طيبين ربنا عرفني بهم قبل نتيجة الثانوية بأيام (وحاليا هم أعز اصحابي) قعدوا يقولوا لي كلام شبه اللي بقوله دلوقتي ويحكولوا تجربتهم وبتاع، وكانوا عبارة عن رزق ربنا ساقه ليا، بفضل الله وحده الناس دول كانوا سبب اني عرفت يعني ايه قيام ليل، وكانوا سبب في تعلم علوم شرعية، وكانوا سبب بطريقة غير مباشرة في حفظ القران وحبي للقران بفضل الله وحده ربنا هيئ لي الأسباب دي..
لا أخفيك سرا يا صاحبي انا فضلت ابكي بكاء الطفل على مجموعي ده واتحسر عليه لغاية سنة ٣ كلية تقريبا، اصله كان حلم وكدا، ايوة انا حاسس بيك والله، حاسس بوجعك، ما انا مجربه، بس تعرف؟ كان أجمل قدر مر عليا في حياتي، بسبب المجموع الوحش والكلية الوحشة اللي مش عاجباني اليع دي ربنا فتح عليا فتوحات من عنده والله لا أقدر ثناءً على الله بسببها،
لما دخلت الجامعة كنت بمشي جنب كليات علوم هندسة وصيدلة وأسنان وبعدهم طب وتربية في طريقي لأقرب موقف عشان اروح، وكنت بحس بالألم اللي يعتصر قلبي، اصل كان نفسي في الكلية اللي هناك دي، حلمي اللي تحطم وبتاع..
بس تعرف؟ انا اهو تخرجت واشتغلت وتزوجت وأنجبت بحمد ربنا أشد الحمد اني مدخلتش ولا كلية من دول، وبحمد ربنا جدا جدا على اللي انا فيه دلوقتي، انا احسن من غيري كتير اوي، لو كنت دخلت الكلية اللي نفسي فيها مكنتش حفظت قران ولا عرفت حاجة عن العلوم الشرعية ولا كنت تزوجت ولا اشتغلت ولا اي حاجة..
ءامن بقضاء الله عز وجل وقدره يا صديقي، واعرف أن كلٌ ميسَّر لما خُلِق له، اكتنز الفترة دي جدا واستمتع بها، احفظ القران، دا اجمل وقت تحفظه فيه، اتعلم العقيدة والفقه والحديث، وافرح بكليتك لأن غيرك اصلا من زمايلك كان اخره في التعليم ٣ ثانوي صناعي (دبلوم فقط) وغيرك كتير بيتمنوا ربع الكلية اللي ربنا قدرهالك..
مجموع الثانوية عمره ما كان مقياس انت ناجح ولا لاء، الناجح بجد يا صغيري هو اللي يخرج من الجامعة بنفس القلب البريء اللي دخلها بيه، الناجح بجد هو اللي علاقته بربنا تكون أقوى وأمتن وهو في ريعان شبابه، الناجح بجد اللي يحمد ربنا على مجموعه دلوقتي ولا يحزن، لأن ده خير ربنا ساقه له.
الناس اللي جابت مجموع حلو وهيدخلوا الكليات اللي بيتمنوها مبارك لكم من القلب، لكن اوصيكم بالاستمرار على الاجتهاد ده في كلياتكم، لأن ياما ناس كانوا ممتازين في الثانوي، راحوا الكلية تكاسلوا وأهملوا الدراسة، افرحوا بمجموعكم واكتنزوا الايام دي لأنها لن تُعوَّض، و واسوا إخوتكم وبلاش تشمتوا يا ولاد، انت بتفرح وتعيش حياتك واخوك اللي لم يوفَّق بيفضل يعاني نفسيا كتير، كُن لأخيك عونًا له على نفسه واحتسب الأجر عند ربك تبارك وتعالى
.
الله يرضى عن الدكتور ابراهيم محمد، الدكتور أحمد عبدالله، الدكتور محمد حجازي، الدكتور محمد دحروج، المهندس محمود ناصر، وشيخي وتاج رأسي الشيخ عماد ياسين..
دول كلهم كلموني وانا في مثل موقفك وكانوا رزق ربنا ساقهم ليا يواسوني ويعلموني انها اقدار ربنا وان الكلية متفصلة على مقاسي وصدقوا كلهم والله.
Forwarded fromشرح متون التجويد
2July 29, 2026 88 1
