"حياة الفتى في غير موضعه قتل"
حد من الشباب كتب دي او قالها في مكان ما، واستأذنته قبل ما ارد عليها في العام هنا.
شوفوا يا رجال، وأخص الرجال دونًا عن النساء في كلامي ده..
مفيش حاجة اسمها حياة الفتى في غير موضعه دي إطلاقا، ليه؟ لأن انت رجل= هتشتغل أي حاجة مهما كانت عشان ربنا يرزقك الفلوس اللي تعول بها نفسك وزوجتك وعيالك، اخوكم اشتغل كتير في حاجات كتير، مش عشان هو حابب الشغل لاء عشان بيسعى على رزقه، سيبكم من اخوكم مش مهم..
النبي صلى الله عليه وسلم دا كان وظيفته الأساسية ايه؟ كان وظيفته انه خاتم الأنبياء والمرسلين وجاء بالرسالة وأداها وبلغ دين الله عز وجل كامل غير منقوص، يعني موضعه الأساسي ايه؟ انه نبي.. صح كدا؟
هل ده منعه من انه اشتغل في التجارة؟ هل ده منعه من الشغل في الرعي؟ هل ده منعه من الشغل عموما؟ هل صلى الله عليه وسلم قال انا هعلم الناس تعاليم الدين وأعلمهم القران وهتفرغ لكدا ومش هشتغل؟ ولا كان صلى الله عليه وسلم بيعمل وبياخد بالأسباب عشان ربنا تبارك وتعالى يرزقه؟
انت رجل = اشتغل اي حاجة عشان مفيش رجل بيقعد في البيت + مفيش رجل بيقعد يندب حظه ويقول انا ايه اللي جابني هنا، (ودي رسالة بوصلها لرجال الثانوية العامة، مش مهم انت في كلية ايه، المهم بعد التخرج هتعرف تشتغل ولا لاء)
انا واحد كان كل حلمي ادخل كلية علاج طبيعي لعشقي المجال ده بتفكيري الصغير وقتها لكن بعد التخرج والسفر والشغل بقول لك كل الرجال هنا تفكيرهم واحد مفيش خلاف عليه وهو (انا عاوز يومي يعدي وانا شغال مش وانا قاعد في البيت لأن كل يوم أقعده في البيت من غير شغل مهما كان ايه الشغل ده عبارة عن فلوس خسرتها مش هعرف اجيب بها اكل لا ليا ولا لعيالي)
انا وانت وغيري وغيرك ومعظم المسافرين بره مصر لما بنسافر بنفهم يعني ايه دنيا، بننسى اصلا القابنا ده مهندس ده دكتور ده سباك ده نجار ده مش عارف ايه، مفيش الكلام ده هنا، الحاجة الوحيدة اللي موجودة هي انا عاوز اشتغل ومش شرط احب ما تعمل خالص، لاء اشتغل بس دلوقتي لحد ما ربنا يفرجها عليك وتلاقي شغل تاني افضل او اريح..
الخلاصة نقدر نقول (حياة الفتى في غير موضعه بتعلمه ازاي يجتهد جدا ويطلع أفضل نسخة من نفسه عشان يقدر يوصل لموضعه اللي بيتمناه أو عشان لما يوصل لموضعه يعرف قيمة المكان اللي هو فيه)
واعرف يا رجل انت وهو، أن على قدر اجتهادك على قدر ما هتلاقي النتيجة ولو شئت فاقرأ قول الله عز وجل "وأن ليس للإنسان إلا ما سعى * وأن سعيه سوف يرى * ثم يجزاه الجزاء الأوفى"
.
حاجة اخيرة هضيفها قبل ما انشر الكلام ده، وهي انك لازم تعرف (يا رجل) انك هتتنفخ وهيطلع عينك وهتتبهدل وهتتمرمط مع أول يوم ليك بعد ما تخلص جيش أو لو مش ليك جيش هتتمرمط مع أول يوم ليك بعد ما تستلم شهادة تخرجك من الكلية، لازم هتتنفخ و وقتها هقول لك مرحبًا بك في مجتمع الرجال اللي بيسعوا على رزقهم وبيأخذوا أجرهم مرتين مرة في الدنيا ومرة عند ربنا ولكن انت احتسب ده عند ربنا اهم حاجة، وبعد كدا جسمك هينحس وهتتعود على النفخ متقلقش..
.
كتبَه عبدالله أشرف.
Forwarded fromشرح متون التجويد
5July 22, 2026 83
