جديد محرم هـــــــــــ1448ـــــــــــــ
نزله لشجاعة العباس عليه السلام
حزامه شده اليوم فخر الساده
وصــارت القادة تــحشم القاده
٭ ٭ ٭ ٭ ٭ ❀❀❀ ٭ ٭ ٭ ٭
هـذا عـبـاس الـمـقاتــل نشـف ريـاك الزلم
نعم تـربات الصـمـيـدة لوهجم ما ينگحم
صار ملك الموت سيفه بچفة يردمهم ردم
بحيل صدره الجيش زاحه الخير البيهم سلم
الجمع يفنيه يحل ميعاده
وصارت القادة تحشم القاده
٭ ٭ ٭ ٭ ٭ ❀❀❀ ٭ ٭ ٭ ٭
شبه حيدر ابو فاضل يعرف فنون الحرب
الجمع ماهمه عددهم لووصل وگت الضرب
وبيمينه العال رده ودخـل بـگـلـبـه الرعب
بالف فارس من تعده راسه دخن لو غضب
يعيد حمله حيدره وامجاده
وصارت القادة تحشم القاده
٭ ٭ ٭ ٭ ٭ ❀❀❀ ٭ ٭ ٭ ٭
بالحرب يرهب حسامه والأرواح يلمها لم
ما تراجع عن قراره اسد ساعات الهجم
ذيب غطاها الكتايب والزلم صارت غنم
الموت بعيون يشوف اليوصل الحد الخيم
الحومه طباهـا تـره بعناده
صارت القادة تحشم القاده
٭ ٭ ٭ ٭ ٭ ❀❀❀ ٭ ٭ ٭ ٭
لو رفع سيفه بيمينه الروس تنزل كالمطر
صولت الكرار عادت دگت اجراس الخطر
جيم شردت جيم تاهت ضايع عليه المفر
شنهي كلي الجيش يمه صار جن نقطه بحر
الجيش ابداً مـايهم بعداده
صارت القادة تحشم القاده
٭ ٭ ٭ ٭ ٭ ❀❀❀ ٭ ٭ ٭ ٭
عالشريعة الف وكفت ضنها ماواحد يمر
ما رجف ذرات كلبه والكتايب طرها طر
نار شبها الحومه بيده والزلم كـرهـا كر
كلها شردت لو نزرها ركض تركض عالجمر
الطف يفرها جنها بيده گلاده
صارت القادة تحشم القادة
٭ ٭ ٭ ٭ ٭ ❀❀❀ ٭ ٭ ٭ ٭
يحصد بروس الاعادي وبالفرس داساه دوس
كربله ضجت وماجت بس جثث لا ما تحوس
خاويه وخمدت محلها جن نخل وبلايه روس
ولـصلاة المـيت اذن كبـر ويـخـطـف نفوس
بكيفه صار الموت ياهو الرادة
صارت القادة تحشم القادة
٭ ٭ ٭ ٭ ٭ ❀❀❀ ٭ ٭ ٭ ٭
الخادم غازي الساعدي
Forwarded fromقصائد الولاء في ملحمة كربلاء
June 13, 2026 265 8
