مبارح كنت قاعد مع دكتور أسنان صديقي بألمانيا، وحكالي كيف استلم منصب… — Dr. Baraa — TG.ME

🔹 مبارح كنت قاعد مع دكتور أسنان صديقي بألمانيا، وحكالي كيف استلم منصب عالي بالعيادة يلي بيشتغل فيها لأن الدكتورة صاحبة العيادة عندها "موقف حلو" من آخر طبيب أسنان سوري، بحيث احترم الدكتور السابق قوانين ترك العمل وخبرها قبل بوقت كبير وضل مداوم لآخر ساعة بآخر يوم، مشان ما يصير في أزمة بالعيادة. 🔹 اليوم في مريض طلع من المشفى من عندي سألني سؤال واحد: قلي انت سوري ما؟ قتلته إي، قلي بصراحة الأطباء هون بيشتغلوا هيك "بالمصاري" بس السوريين بيشتغلوا هيك "بالقلب"، وقلي آخر فحص طبي حقيقي لقلبه كان كمان عند طبيب سوري، ضل 15 دقيقة عم يتشكرنا أنا ومشرف القسم "السوري". 🔹 رئيسة القسم حابة بيوم من الأيام بسا اطلع لكمل اختصاصي، أعطيها اقتراح لحدا يجي محلي يكون بيشتغل متلي، ودغري خطر ببالي كم زميل سوري ممكن يبيضوا وشي ويكملوا هالصيت الحلو. 🔸 بالمقابل: إحدى أوبرية المشافي يلي بعرفها حرم يجيب دكاترة سوريين لأن آخر 3 كذبوا وأخذوا مرضيات وتركوا بلحظة ليرجعوا ع معونة الدولة وخبصوا الدنية. لما تشتغل نضيف وتكون صادق مع قسمك، مو بس صيتك ح يتحسن، وإنما صيت السورين بالعموم، ما كان ح يصحلي شاغر لولا أن يلي قبلي ترك انطباع حلو، ومحا يصح ل يلي بعدي لولا أني ناوي اترك انطباع حلو ان شاء الله، وهيك سنة تعتبر صدقو جارية كل ما اجا حدا استفاد بسببك. لما انت تشتغل شبل وتفكر حالك عم تتحربق وتسلخ "كرانكات" وتعمل حركات الاستغلال الأعظم، ف صيتك وصيت بلدك كله ح ينتزع وحتنزع ع كل سوري ح يقدم وراك عالوظيفة، وإذا ما بيهمك غير حالك ف انت بحد ذاتك ح تنقص احتمال تلاقي وظيفة، آخر واحد ممكن اقترح عليه شاغر معي هو شخص عرفانه بيشبل وبيخبص وبيبليني بالشغل ويسود وجهي، لا تفكر حدا ح ياكلها قدك، ولو أول شي توهمت انك انت المستفيد من هالمرضيات والحربقة. + في كتير سوريين بيرفعوا الراس بكل مكان وزمان، لا كتير تمعلش جلد الذات واستحقار الحال. ولكن الشاذ هو يلي بيتصدر لوائح الأخبار لأسباب معروفة.