အခုအချိန်မှာ မြန်မာပြည်ကနေ လူငယ်တွေ အများကြီး ဘာကြောင့် ထွက်သွားဖို့ ပြင်နေကြသလဲဆိုတာ အထူးတလည်မပြောလည်း သိကြမယ်ထင်ပါတယ်။ ဒါက နိုင်ငံအပေါ် ဘယ်လို အကျိုးသက်ရောက်မှုရှိနိုင်သလဲဆိုတာကို စီးပွားရေးရှုထောင့်ကနေ ကျွန်တော် အကြမ်းဖျဉ်း ဆွေးနွေးချင်ပါတယ်။ လူငယ်တွေ နိုင်ငံတွင်းကနေ ထွက်သွားကြတာက နိုင်ငံအပေါ် သက်ရောက်နိင်တဲ့ အချက် ၁၀ ချက်ကို ကြည့်ကြရအောင်ဗျာ။
၁။ အရည်အချင်းရှိတဲ့ အလုပ်သမားတွေ ဆုံးရှုံးရပါတယ်။
ပညာတတ်ပြီး အရည်အချင်းရှိတဲ့ လူငယ်တွေက တခြားနိုင်ငံတွေကို ထွက်သွားတဲ့အခါ မြန်မာနိုင်ငံက တန်ဖိုးရှိတဲ့ လူသားအရင်းအမြစ်တွေကို ဆုံးရှုံးလိုက်ရတာဖြစ်ပါတယ်။ ဒါက နိုင်ငံရဲ့ စီးပွားရေးအရတိုးတက်မှုနဲ့ တီထွင်ဆန်းသစ်မှုတွေအပေါ် အကျိုးသက်ရောက်နိုင်ပါတယ်။ ဒါပေမဲ့ “အရည်အချင်းရှိ အလုပ်သမားတွေ”ဆိုတဲ့ စကားစုထဲမှာ ကာယလုပ်သားတွေ ဥပမာ လယ်သမားတွေ၊ ဆောက်လုပ်ရေးအလုပ်သမားတွေနဲ့ အထည်အလိပ်စက်ရုံ အလုပ်သမားတွေလည်း ပါဝင်လို့နေပါတယ်။ သူတို့တွေ နိုင်ငံထဲက ထွက်ခွာသွားတာက ဒီ အရေးပါလှတဲ့ လုပ်ငန်းကဏ္ဍတွေ ဆက်လက်လည်ပတ်ဖို့အတွက် ကြီးကြီးမားမား အဟန့်အတားဖြစ်စေနိုင်ပါတယ်။
၂။ အထူးကဏ္ဍအသီးသီးက ပညာရှင်တွေကို ဆုံးရှုံးရနိုင်ပါတယ်။
ခြုံငုံပြီးပြောရရင်တော့ လူတွေ နိုင်ငံကနေ ထွက်ခွာသွားတာက မတူညီတဲ့ လုပ်ငန်းခွင်အသီးသီးကို သက်ရောက်မှုရှိနိုင်ပေမယ့်လည်း ထူးခြားကဏ္ဍတွေကတော့ အတော်ကို ပိုပြီး သက်ရောက်မှု ဒဏ်ကို ခံရပါလိမ့်မယ်။ ဥပမာ ပညာတတ် လူငယ်ပညာရှင်တွေ ထွက်ခွာသွားတာနဲ့အမျှ သိပ္ပံပညာ၊ နည်းပညာ၊ အင်ဂျင်နီယာပညာနဲ့ ဆေးပညာ (STEM) တွေလို အလွန်အရေးပါတဲ့ နယ်ပယ်တွေမှာ ပညာရှင်အမြောက်အများကို ဆုံးရှုံးရပြီး ဒီကဏ္ဍတွေမှာ တိုးတက်မှုနဲ့ ဆန်းသစ်တီထွင်မှုတွေ နှောင့်နှေးကြန့်ကြာနိုင်ပါတယ်။
၃။ စီးပွားရေးတွေ ဆက်လက်လည်ပတ်ရာမှာ အခက်အခဲတွေ ကြုံတွေ့ရနိုင်ပါတယ်။
သတင်းတွေထဲမှာ လုပ်ငန်းရှင်တွေက လူငယ်တွေ နိုင်ငံက ထွက်ခွာတာနဲ့အမျှ အထည်အလိပ်၊ ဆောက်လုပ်ရေး၊ လယ်ယာစိုက်ပျိုးရေး၊ အရောင်းအဝယ်လုပ်ငန်းနဲ့ ဝန်ဆောင်မှုကဏ္ဍတွေမှာ လုပ်သားအင်အားနည်းပါးလာတယ်လို့ ပြောလာကြပါတယ်။ လုပ်သားအင်အားနည်းပါးလာတာက စီးပွားရေးလုပ်ငန်းပေါင်းများစွာကို ထုတ်လုပ်နိုင်စွမ်းလျော့ကျစေနိုင်ပါတယ်။ သုံးနှစ်အတောအတွင်း ဝင်ငွေတွေ လျော့နည်းလာတာက စီးပွားရေးလုပ်ငန်းတွေ ပိတ်သိမ်းရလာဖို့ များလာနိုင်ပါတယ်။
၄။ လစာနည်း သုံးငွေပမာဏနည်း
ဝင်ငွေလျော့လာလေလေ လုပ်ငန်းတွေအဖို့ ပညာရှင်တွေနဲ့ ကျွမ်းကျင်လုပ်သားတွေ၊ အလယ်အလတ် ကျွမ်းကျင်လုပ်သားတွေကို လခ ပုံသေပေးထားဖို့က ခက်လာလေလေဖြစ်လာပါလိမ့်မယ်။ ဒါက လူတစ်ယောက်ချင်းစီရဲ့ ဝယ်ယူနိုင်စွမ်းအားက ကျသွားပြီး စီးပွားရေးကို ထိခိုက်မှုရှိနိုင်ပါတယ်။
၅။ ပြည်တွင်းသုံးစွဲမှုနှုန်း လျော့ကျနိုင်ပါတယ်။
လူငယ်တွေဟာ ကုန်ပစ္စည်းနဲ့ ဝန်ဆောင်မှုတွေအပေါ်မှာ သုံးတဲ့ သူတို့ရဲ့ အသုံးစရိတ်တွေကြောင့် နိုင်ငံတစ်ခုရဲ့ ပြည်တွင်းသုံးစွဲမှုမှာ အဓိက ပါဝင်သူတွေဖြစ်ပါတယ်။ သူတို့ ထွက်ခွာသွားတယ်ဆိုတာက သုံးစွဲသူဝယ်လိုအားကျလာနိုင်ပြီး လုပ်ငန်းတွေနဲ့ စီးပွားရေးမှာ ဆိုးဆိုးရွားရွား သက်ရောက်မှုရှိနိုင်ပါတယ်။
၆။ လူမှုဖူလုံရေးနဲ့ ကျန်းမာရေးစောင့်ရှောက်မှုတွေမှာ အခြေအနေတင်းမာလာနိုင်ပါတယ်။
လူငယ်ဦးရေ လျော့ကျလာတဲ့အခါမှာ သက်ကြီးရွယ်အိုတွေကို ကျန်းမာရေးပိုင်းကနေ ထောက်ပံ့စောင့်ရှောက်ရေးက ပိုပြီး ခက်ခဲလာနိုင်ပါတယ်။ ဒါကနေ အစိုးရအနေနဲ့ ငွေကြေးသုံးစွဲမှုပိုတိုးလာနိုင်ပြီး ကျန်ရှိနေတဲ့ အလုပ်လုပ်ကိုင်နေကြတဲ့ လူတွေအတွက် အခွန်အခတွေ ပိုများလာနိုင်ပါတယ်။
၇။ စီးပွားရေးပိုင်းမှာ ဆန်းသစ်တီထွင်မှုတွေနဲ့ စွန့်ဦးတီထွင်မှုပိုင်းမှာ လျော့ကျလာနိုင်ပါတယ်။
လူငယ်တွေက များသောအားဖြင့် ဆန်းသစ်တီထွင်ကြပြီး စွန့်ဦးတီထွင်နိုင်ကြတဲ့သူတွေဖြစ်ပါတယ်။ သူတို့မရှိတော့ဘူးဆိုကတည်းက လုပ်ငန်းစီးပွားအသစ်တွေ ဖန်တီးမှုမရှိတော့ပဲ စီးပွားရေးတိုးမြှင့်မှုမှာ ကျဆင်းလာနိုင်ချေရှိပါတယ်။
၈။ အခွန်လျော့နည်းလာနိုင်ပါတယ်။
လူငယ်လုပ်သားတွေ အမြောက်အများထွက်ခွာသွားတဲ့အခါ အစိုးရအနေနဲ့ အခွန်တွေ လျော့နည်းလာတာကို ကြုံတွေ့ရနိုင်ပါတယ်။ ဒါက အခြေခံအုတ်မြစ်တွေ၊ ပညာရေးကဏ္ဍနဲ့ ကျန်းမာရေးစောင့်ရှောက်မှု အစရှိတဲ့ အရေးကြီးကဏ္ဍတွေမှာ ရင်းနှီးမြှုပ်နှံဖို့ အဟန့်အတား ကန့်သတ်ချက်တွေရှိလာနိုင်ပါတယ်။
၉။ ရင်းနှီးမြှုပ်မှုမှာ လျော့ကျလာနိုင်ပါတယ်။
ရင်းနှီးမြှုပ်နှံသူတွေက လူငယ်လူထုလျော့ကျလာတဲ့ နိုင်ငံတစ်နိုင်ငံမှာ ရင်းနှီးမြှုပ်နှံဖို့ လက်တွန့်နိုင်ပါတယ်။ ဘာကြောင့်လဲဆိုတော့ ဒါက အနာဂတ်မှာ စီးပွားရေးဆိုင်ရာ စိန်ခေါ်မှုတွေ ကြုံလာရနိုင်တယ်ဆိုတဲ့ အချက်လက္ခဏာဖြစ်ပြီး စီးပွားရေးတိုးတက်မှုကို အဟန့်အတားကြီးတစ်ခု ဖြစ်လာစေနိုင်ပါတယ်။
၁၀။ ယိုယွင်းယိုင်နဲ့လာနိုင်တဲ့ ပြည်သူ့အကျိုးပြု ဝန်ဆောင်မှုတွေ
လူငယ်အလုပ်သမားတွေ နည်းပါးလာတာက ပညာရေး၊ ကျန်းမာရေးနဲ့ ပို့ဆောင်ဆက်သွယ်ရေး ကဏ္ဍတွေလို အရေးပါတဲ့ လူထုအကျိုးပြု ဝန်ဆောင်မှုတွေမှာ ဝန်ထမ်းတွေ နည်းလာပြီး ပြည်သူတွေရဲ့ ဘ၀အရည်အသွေးအပေါ် မကောင်းတဲ့ သက်ရောက်မှု ကျရောက်လာနိုင်ပါတယ်။
Facebook
ငွေစကား | Facebook
ငွေစကား Facebook Group ကနေ အားလုံးကိုကြိုဆိုလိုက်ပါတယ်ဗျာ။ ဒီဂရုလေးကတော့ စာဖတ်သူတွေအားလုံး ဆွေးနွေးနိုင်မယ့် စကားဝိုင်းတွေမှာ ပါဝင်နိုင်မယ့်အပြင်...
3
1April 5, 2024 1.1K 1
