MIB Andijon | Rasmiy kanal

Маълум бўлишича, Бюронинг Андижон шаҳар бўлими иш юритувига Андижон туманлараро иқтисодий судининг 05.06.2023 йилдаги ижро варақасига асосан қарздор “I.S.F.SH” МЧЖ ва “Q.L” МЧЖлар ҳисобидан солидар тартибда ундирувчи “ИПАК ЙЎЛИ” АТБ фойдасига 29,5 минг АҚШ доллари миқдорида асосий қарз, 476,7 АҚШ доллари миқдорида фоиз ҳамда 30 000 сўм почта харажатлари ундириш белгиланган.

Ундирув кредит таъминоти сифатида гаровга қўйилган жавобгар “Q.L” МЧЖга тегишли Андижон шаҳарда жойлашган “Дорихона биноси” ҳамда Андижон шаҳарда жойлашган “Савдо ва маиший хизмат кўрсатиш шохобчаси”га қаратилган.

Мазкур ижро ҳужжати Бюронинг Андижон шаҳар бўлими иш юритувига 12.07.2024 йилда келиб тушган ва шу кундан ижрога қаратилган.

“Q.L” МЧЖга тегишли “Шохобча” 581,5 млн. сўмга баҳоланган бўлиб, банк ва кредит олувчи томонидан тасдиқланган келишувга кўра 443,5 млн. сўм миқдорида гаровга қабул қилинган.

Ижро ҳаракатлари давомида қарздор “Q.L.” МЧЖга тегишли “Шохобча” 21.08.2024 йилда хатланиб, рўйхатга олинган ҳамда сақлаш учун қарздор вакили М.Мамадалиевга топширилган.

Шунингдек, 21.08.2024 йилда қарздор вакили М.Мамадалиевга гаровдаги мол-мулк 443,5 млн. сўмга аукцион савдосига
чиқарилаётгани ҳақида хабарнома берилган.

Қарздор ва унинг вакили томонидан қарздорлик тўланмаганлиги ҳамда суд ёки ваколатли органларнинг аукцион савдоларини тўхтатиш ёки бекор қилиш тўғрисида қарорлари тақдим этилмаганлиги сабабли гаров мулки 05.09.2024 йилда 443, 5 млн. сўмга аукцион савдосига чиқарилган.

Аукцион савдоси 29.11.2024 йилда ўтказилиши белгиланган бўлса-да, Андижон туманлараро иқтисодий судининг 22.11.2024 йилдаги ажримига асосан ижро ҳужжатининг ижроси якуний суд ҳужжати чиқарилгунига қадар тўхтатилган.

Қарздор вакили М.Мамадалиев 28.03.2025 йилда, яъни аукцион савдоси белгиланган кун “ИПАК ЙЎЛИ” АТБга қарздорликни тўлаган ҳамда қарздорлик мавжуд эмаслиги ҳақидаги маълумотномани банк вакили Х.Худаяров томонидан давлат ижрочиси Р.Абдувалиевга Телеграм мессенжери орқали соат 09:46 да юборилган.

Хатнинг асл нусхаси Бюронинг Андижон шаҳар бўлими иш юритувига соат 09:55 да келиб тушган. Р.Абдувалиев ушбу маълумотнома асосида аукцион савдосини бекор қилиш тўғрисида хабарномани тайёрлаб, бўлим бошлиғига тасдиқлатган ҳолда соат 09:58 да “МИБ-портал” ахборот тизимига юклаган.

Бироқ “Электрон онлайн-аукционларни ташкил этиш” АЖ томонидан мазкур хабарнома асосида онлайн-аукционни тўхтатиш рад этилган.

Рад этиш сабаби сифатида Ўзбекистон Республикаси Вазирлар Маҳкамасининг 12.01.2022 йилдаги 18-сон қарори 91-бандида, аукцион ёки танловга қўйилган объектни савдодан олиш бўйича ёзма сўров хати фақат савдо платформаси орқали аукцион ёки танлов ўтказиладиган кун соат 09:50 гача (GMT+5) қабул қилиниши белгиланганлиги кўрсатилган.

Аукцион савдоси соат 10:00 да бошланган ва қарздорга тегишли мулк аукцион савдосида 798,3 млн. сўмга сотилган.

Аукцион ташкилоти томонидан мулк сотилган қийматининг 99 фоизи, яъни 790,3 млн. сўм маблағ Бюронинг Андижон шаҳар бўлими ҳисоб рақамига келиб тушган.

Шунга кўра, аукцион савдоларида сотилган Андижон шаҳарда жойлашган “Савдо ва маиший хизмат кўрсатиш шохобчаси” аукцион ғолиби Ж.Абдураҳмановга топширилиши таъминланиб, ижро иши юритиш Қонуннинг 41-моддаси 1-қисми 1-бандига асосан тамомланди.

Бундан ташқари, ижро ишига масъул бўлган Бюронинг Андижон шаҳар бўлими давлат ижрочисининг хатти-ҳаракатларида ўрганиш натижаси бўйича давлат ижрочиси томонидан қонунбузилиш ҳолатлари аниқланмаган.