من الأرشيف
الكام منك بكام؟
طيب بما إن نسبة كبيرة من متابعينا مهندسين خبرتهم أقل من 10 سنين، فحابب أتكلم في موضوع مهم، ويمكن شائك شوية...
واحدة من أكبر المشاكل اللي بنواجهها كلنا، سواء جوه مصر أو بره مصر، هي مشكلة المرتبات في سوق المقاولات.
كل شوية تلاقي حد منزل قائمة مرتبات، والناس في الكومنتات تقول:
*"الكلام ده في أنهي كوكب؟!"*
*"إحنا عمرنا ما شفنا الأرقام دي."*
بس الحقيقة... الأرقام دي موجودة فعلًا.
ايوه فعلاً، المرتبات العالية اللي بنشوفها في قوائم الرواتب موجودة، وفي شركات كتير بتدفعها، ومش شرط تكون اكبر شركات في السوق.
وفي نفس الوقت...
المرتبات الضعيفة برضه موجودة، ويمكن هي الأكثر انتشارًا.
طيب إيه السبب؟
من وجهة نظري، المشكلة مش سببها الشركات بس... ولا الموظفين بس... لكنها نتيجة العرض والطلب.
لما يبقى فيه ناس بتقبل بأي رقم، حتى لو أقل من القيمة الحقيقية للشغل، طبيعي مع الوقت بعض الشركات تبدأ تعتبر إن ده هو الطبيعي، وتعرض نفس الأرقام وهي عارفة إن في النهاية حد هيوافق.
وده للأسف بيأثر على السوق كله.
وطبعًا لازم أوضح نقطة مهمة...
أنا عارف إن فيه ناس بتكون مضطرة تقبل أي فرصة بسبب لظروف خاصة جداً، وده شيء مفهوم. لكن كلامي هنا عن اللي عنده القدرة يختار أو يفاوض، ومبيحاولش يعرف قيمته في السوق.
بص لأي مهنة أو سوق منظم...
لما الناس يبقى عندها حد أدنى غير مكتوب لكنها ملتزمة بيه، بتلاقي مستوى الرواتب بيتحسن تدريجيًا، لأن أصحاب الأعمال بيبقوا عارفين إن أقل من كده محدش هيقبل.
طيب... إيه الحل؟
الحل يبدأ منك.
* اعرف قيمتك الحقيقية.
* اعرف متوسط المرتبات لتخصصك وسنين خبرتك.
* اعرف الفرق بين الشركات المحلية، وشركات الـ EPC، والاستشاريين، والشركات الأجنبية، لأن كل واحدة ليها رينج مختلف.
* متوافقش على أول رقم من غير تفاوض، لأن في شركات كتير بتحط رقم ابتدائي وبتكون مستنية تفاوض.
* طور نفسك باستمرار، لأن كل مهارة جديدة بتزود قيمتك في السوق.
طيب ليه فيه شركات بتدي مرتبات ممتازة لناس يعني , ايه الفرق بيني وبينهم؟
لأسباب كتير، أهمها:
✅ أولًا: لأنه رزق من عند ربنا للناس دي.
✅ ثانيًا: الشركات المحترمة فاهمة إن الكفاءة لها تمن. الموظف الشاطر ممكن يكون مرتبه أعلى، لكنه يوفر عليهم أخطاء، وتأخير، وإعادة شغل، ومشاكل تكلفتها أكبر بكتير من فرق المرتب. وبالمناسبة الموظف ده بيتم استقطابه من خلال العلاقات بشكل اساسي, يعني لو حد يعرف حد بحيث يضمنوا انهم مش هيجربوا لسه الموظف الجديد,
✅ ثالثًا: المعلومة قوة.
قبل ما تروح أي إنترفيو، حاول تعرف متوسط الرواتب في الشركة. اسأل حد تعرفه، أو تواصل مع موظفين حاليين أو سابقين على LinkedIn. لما تبقى عارف الرينج، هيكون التفاوض أسهل، ومش هتسيب مساحة كبيرة لأي حد يقلل من قيمتك.
✅ رابعاً: الكفاءة
الشركات عموما مش مؤسسات خيرية , فأكيد بيتعمل انترفيوهات بتحدد مدى كفاءة الشخص وملائمته للوظيفة و خلال الانترفيوهات بيتعرف قيمة الشخص الفعليه وال بناء عليها بيتم اعتماده
وفي النهاية...
اعرف إن مرتبك مش مجرد رقم هتاخده آخر الشهر...
ده القيمة اللي السوق شايفك وشايفنا كلنا بيها.
فأعمل الصح واسعى وخد بالاسباب كلها والباقي على ربنا. بس خليك فاكر ... لو إنت نفسك مش مقتنع بقيمتك، صعب جدًا تقنع بيها أي شركة.
بالتوفيق
م.كريم جابر
9
2August 23, 2026 6.5K 3
