💠 #گون_آیدین، هموطنلر
بلکه صاباحین سسسیزلیگینده،
بلکه آخشامین قارانلیغیندا،
سسلی یا دا سسسیز گؤزلهییشلرده،
گل آرتیق، ائی سئوگیلی یار!
جانیمی یاخار بو وخیم دوروملار،
سئوگیندن یوخسون روحوم قاناد چیرپار.
تک قانادلا اوچا بیلمز قوشلار،
گل آرتیق، ائی سئوگیلی یار!
نئجه ده سوسامیش لوطفونه کؤنلوم!
یانیمدا ایکن بئله، حسرت دویدوغوم،
نغمهلر ایچینده چیغلیق اولدوغون،
گل آرتیق، ائی سئوگیلی یار!
عاغیللانماز بو کؤنلوم الینه دوشمهدن.
سئودا چیچکلریم سنسیز سولمادان،
حسرتین بو بدنی یاخمادان،
گل آرتیق، ائی سئوگیلی یار!
بیر آز زامان قالمیش بو حوکوم،
درمان سنده، من ایسه بیر هئچم.
عشقینین باغیندان شراب ایچمیشم.
گل آرتیق، ائی سئوگیلی یار!
اولدوزلار گونش ایله ایشیق ساچارکن،
من سئودانین یانسیماسینی آرارکن،
وارلیق دونیام قارانلیغا باتارکن،
گل آرتیق، ائی سئوگیلی یار!
یول اۇزۇن، سونسوزلوغا آچیلار بو قاپی.
توت الیمدن، آل منی ایچَری،
گزَک بیرلیکده جنّتِ اعلانی،
گل آرتیق، ائی سئوگیلی یار!
ار مئیدانیندا دوران ایگیدم،
سئودانین باشیندا گؤزلر بدنیم.
سون نفسیمی وئرمهدن، گولوم!
گل آرتیق، ائی سئوگیلی یار!
رئیحان عطرین ساردی دا منی،
گول تنینه توخوندو دا اللریم.
«مهمت» غریبی اؤلمهدن، گؤزلیم،
گل آرتیق، ائی سئوگیلی یار!
✍🏼 مهمت دوهچی
Khalkhalim.com
🆔️ @khalkhalim
9September 7, 2026 1.8K
