🌼🍃🌸🍃🌺🍃🌸🍃
🍃🌺🍃🌸🍃
🌺🍃🌸
🌺
وطن ایکاش گلیب چیخام داغووا
اوردان باخام بیر سولووا ، ساغووا
نظر سالام کوشنووه ، باغووا
ناله ائدم سسیم دوشه عالمه
بولودلارون آغلییالار نالمه
عمریم گئچدی سنی یاددان آتمادیم
چوخ چالیشدیم ، تورپاغووا چاتمادیم
اولدوزلاری سایدیم، غم دن یاتمادیم
هیجران غمی جوانلیقی قوجالدار
لال دیللرین آه ناله سین اوجالدار
دیلخوشلیغلار وطن هاردا قالدیلار؟
سنی من دن گوره ن کیملر آلدیلار؟
هیجران غمین اوره ییمه سالدیلار!
چوخ ظولمیله آیری دوشدوم ائلیم دن
تا ائولونجه آدون دوشمز دیلیم دن
وطن دیییب اوره ک باشین داغلارام
غملی اوره ک قاپ باجاسین باغلارام
سوزلرینی اوزوم دیییب آغلارام
زندانیدی اوره کده چوخ سوزلریم
غربت یئرده دینجین آلماز گوزلریم
سوروشماسین ائللر اوره ک سوزومو
ایشیتمه یه اولار چتین دوزومو
باغلامایین من ائولنده گوزومو
قولوم اوسته دوزون وطن داشینی
گوردا گورسین گوزوم توکور یاشینی
اوز ایچیمده بولاق کیمی داشارام
دیاریمین حسرتیله یاشارام
قوشلار کیمین کاش اوچماغی باشارام
فرصت لرده قاناد چالیب اوچام من
او قصب اولان کنده ساری قاچام من
فهیمه اختیاری ممان(رعنا)
#کاوان ۱۴۰۵/۳/۱۷
@Kavaniha
🌸
🌺🍃🌸
🍃🌺🍃🌸
🌼🍃🌸🍃🌺🍃
June 7, 2026 489 1
