قصيدة بلسان حال فاطمة العليلة …. ـــــــــــــــــــــــــــــــــــــ… — الرادود الحسيني سيد كرار الحسني

الرادود الحسيني سيد كرار الحسني@karar9497 · 1.3K subscribers Open in TelegramOpen

قصيدة بلسان حال فاطمة العليلة ….
ــــــــــــــــــــــــــــــــــــــــــــــــــــــــــــــــــ

يالعايف روح مهضومة
بدمـوع ونوح ملچـومة

مـعلولة أتسلّى بدمعاتي
لا ما تتوصّف شوغاتي

بدموع ونوح ملچومة

ـــــــــــــــــــــــــــــــــــــــــــــــــــــــــــــــ

صِرِت أحسِب حساب الليل إذا جاني
خِلْـــصَت كِل سوالِف هَضمي وحزاني
بتعابـــــير الألـــــــــم والهَـــــم تِلَگّاني
ما عِنــــدِچ يفـــاطِم مـن شُغُـــل ثاني
مشغول الفِكِر بَــس بُـــــمّي وخــواني
وفراگــــك يــــبويه الغَـــــيّر ألــــواني

گلبي بهَم ذاب يا الغـالي
وجهك ما غاب عن بالي

مَحّد مَر بيــهِن حالاتي
لا ما تتوصّف شوغاتي

بدموع ونوح ملچـــومة

ـــــــــــــــــــــــــــــــــــــــــــــــــــــــــــــــــ

بحُروف ٱمنِ الحِزن يابويه أناديكُم
وَســألها الطيــــور البِالسّـــما ٱعليكُم
مِشتاگة أصِد إلكُـــــــم وحَــــاچيكُم
وإذا إنتـــــم ظُمايا بدمعي أرَوّيــكُم
أسكِت والگــلب يِذكُــــــر أســامِيكُم
لا ما فارِگَــــت ذهـــــني مَعــــانِيكُم

أسألكم ليش عفتـوني
أتصَبّر بيش حاچُوني

كِسرَت كل حاجِز آهاتي
لا ما تتوصّــف شوغاتي

بدموع ونوح ملچـــومة

ـــــــــــــــــــــــــــــــــــــــــــــــــــــــــــــــــــ

رَيتَك بويه حاضِــر يا أعَـــز ناسي
وتِنظُر مِن هِجَم شِيبي على رَاسي
يا جُملة التُّــوَصّف إلــكُم ٱحساسي
مِن عگبك عَليلة وأحسِب أنفــاسي
أثاري موتي أرحَــم والهَــجُر قاسي
ما غَيرَك حَنين بچِــــلمِته ٱيواسـي

مِنتَظرة وطال هِجرانك
إرجَـــع بالحال لَوطـانك

بدروبك أنثُـــر وَرداتي
لا ما تتوصّف شوغاتي

بدموع ونوح ملچـــومة
ـــــــــــــــــــــــــــــــــــــــــــــــــــــــــــــــــ

يِرَبّت صبري يالغالي على ٱمتوني
أسيرة للحِــزِن ليش ٱنتو عِفتـوني
تَهَــــدّم بالمـــــدامع ساتِر ٱجفـوني
گِلِـــت لا مُستحيل ٱنتم نِسـيتوني
نِحيلة والمرض هَـــــدني إلِحگوني
رِدِتكم يَمّي يَحبـــــابي وتِشوفـوني

ظل يِسعَر دوم بُركاني
ما شـافَت نوم أجفاني

تاهَت أفكاري بحَسباتي
لا ما تتوصّف شوغاتي

بدموع ونوح ملچـــومة
ـــــــــــــــــــــــــــــــــــــــــــــــــــــــــــــــــــ

إذا عينـي غُفَت لحظة يِحِل طَيفَك
أشـوفك چَن وحيد بيَــمنِتَك سِيفَك
عِشِت حُر بحـياتك ورفَضِت حَيفَك
وتِخـتار ٱنتَ هــاي المـنزلة بكــيفَك
زينـب من طِحِــت ما تِقـبَل ٱتعِيفَك
صريع بكربله وصار العِطَش ضِيفَك

بِخْيامك نار مشبوبة
وِعْيالك ثار مطـلوبة

بِحبال ٱنچِـتفَن خَيّاتي
لا ما تتوصّف شوغاتي

بدموع ونوح ملچـــومة
ـــــــــــــــــــــــــــــــــــــــــــــــــــــــــــــــــ

نَهَر گلـــبك يبويه وأنتِــعِش گُربـه
يِشفه ٱمنِ العِلَل كِل واحد ٱيشُربه
وفراگ النّحِــــبـــهُم ذروة الغُـــربة
شِلهه بالحـــياة العَالهَـــجُر تُــربـــة
معلـــولة ونِحيــلة وطايحة بكُـربة
أقَــدّم عُمـــــري لله بنِيّة القُـــــربة

بَس أسمع صـوت أحبابي
بغيــــابك مـــوت يَم بابي

بالحسرة ٱنخِتمَت ساعاتي
لا ما تتـــوصّف شــوغاتي

بدموع ونوح ملچـــومة
ـــــــــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي
https://t.me/+5rh8FQDIGkoyMWM6

الرادود الحسيني سيد كرار الحسني

https://t.me/+5rh8FQDIGkoyMWM6