شلون اشبگچ ... حاچاهه صوت امن النحر
شلون اشبگچ ... وسهامي عبرن عالظهر
رقيتي _اجيتي _ يبويه _ يبويه
//////////////////////////
البيهه ريحة حظن ابوهه _ وهيه تركض سلبوهه
گبل ساعه من ركضنه ظيعتهه
طفله مثل الورده چنهه _ مشت يم حسين اظنهه
ذيچ هيه عالجسد تبچي شفتهه
طفله تسولف وي المنحر _ وتحسبله شكد الچويات
وانه اركض لاگوني تگله _ سلبو مني الترچيات
دخان وليل ودورتك _ وبنيتك شبعت طيحات
روحي شاغت ... مچويه وباأذني جرح
روحي شاغت ... متعبك يبو اليمه الذبح
التراچي _ خذوهن _ يبويه _ يبويه
//////////////////////////
باست احسين ابوريده _ وحاولت تغفه اعله ايده
بقت تبچي باايده شافت نقص خنصر
جرحك ابطارف حجابي _ گمت امسحه وياعذابي
تگله صعبه على فراگك صعبه اصبر
تفتر فوگه اهواي تحاول _ تشبگ صدره الكله سهام
حاچت نحره مو متعوده _ بويه بحظنك عيني تنام
يوم العاشر ياابو جروحي _ اهل البيت بلايه اخيام
بحرگه تحچي ... انه اوله من يمي السهم
بحرگه تحچي ... بصدرك غرب گلبي نلچم
مكاني _ تفرهد _ يبويه _ يبويه
//////////////////////////
حيرتچ هايه اشيحلهه _ سهامي ماتطلع يگلهه
والله حگچ ادري مشتاگه اليه
مسحي برداني دمعتچ _ وابدالي شبگي عمتچ
نفس حظني حظن عمتچ يارقيه
عنچ جاي ادور زينب _ بهذا الليل ادور جاي
وصلت للعباس ورجعت _ بس زعلهه هواي الماي
تعبت من اركاض الهيمه _ ويمهه الشامت رايح جاي
صيحي زينب ... معذوره عني اتاأخرت
صيحي زينب ... عنچ تره شكد دورت
بتعبهه _ تدور _ يبويه _ يبويه
//////////////////////////
تگله خدي بدمعي ناگع _ وانته صدرك نصه ظايع
ذاكه راسك والرمح عالي دخيلك
الشال راسك خفت اگله _ ينزله اليه وما ينزله
عن چويتي ردت اشوفك واشتكيلك
ودعتك من ظهر العاشر _ ووداعك مستعجل چان
راسك جابو يمنه المغرب _ من اشفافه مبين عطشان
ياابو الغيره اخيامك تدري _ حرگوهن فوگ النسوان
ذاكه راسك ... هوه بكتر وانته بكتر
ذاكه راسك ... فوگ الرمح من العصر
اريده _ ينزله _ يبويه _ يبويه
//////////////////////////
رحت وندارت عليه _ شبگ شبگتني رقيه
نحره گلي يابعد روحي اجيتي
يابعد اختك اجيتك _ تحچي وي بنتك لگيتك
ها يبويه عالرمل يمي غفيتي
خويه بصفك نامت بنتك _ خل ترتاح بهذا الليل
عثرت من ركضت حسبالي _ وسحگتهه يحسين الخيل
ياابو سكينه عگب اعيونك _ گامت بيه الدنيه تميل
بحظني نامت ... برجليهه طافي شگد جمر
بحظني نامت ... چي منك اشمت عطر
رقيتك _ تشمك _ يبويه _ يبويه
//////////////////////////
تمت ____ علاء الزيـــدي
https://t.me/+5rh8FQDIGkoyMWM6
Telegram
الرادود الحسيني سيد كرار الحسني
https://t.me/+5rh8FQDIGkoyMWM6
3June 3, 2026 533 1
