يحسين لا تنسانه بالمكبره اتلكانه
ــــــــــــــــ1ـــــــــــ
يبن ادم وهم دنياك خاف افلوسك اتغرك
محسوب العمر كل يوم ينكص يوم من عمرك
تاليتك اجنازه اتصير تاخذ خيرك وشرك
أمن يل خدمت احسين هوه ايحضرك بكبرك
بحماك يا مولانه يحسين لا تنسانه
ـــــــــــــــ2ـــــــــــــــ
يل ما حسبت للموت فز من نومتك غلطان
شمال طال العمر هم يوم يحفر كبرك الدفان
وحدك بالكبر مدفون جسمك حصة الديدان
بس الكاض ايد احسين دنيا واخره ربحان
سد الكبر يحسين لا تنسانه
ـــــــــــــــــ3ــــــــــــ
عشت امن الطفوله وياك بيت ابكلبي الك باني
من كد ما لطمت اعليك خادم صار عنواني
تزلك رجلي بس ما اطيح كل ما اضيع تلكاني
يشهد ربي ما ناسيك انته اشلون تنساني
خدامك وترعانه يحسين لا تنسانه
ــــــــــــــــــ4ـــــــــــــــــ
انه ادري بمنايه وموت يخلص هالعمر تالي
باجر بالكبر مدفون وحدي ومحد بحالي
شلت اوياي بس اذنوب كلها اتفشل اعمالي
اصيح ادخيل ابو السجاد شفتك واكف كبالي
لو خلصت دنيانه يحسين لا تنسانه
ــــــــــــــــــ5ــــــــــــــــ
وحشه المكبره وباليل ساعات الرعب تبدي
بتراب الكبر يحسين ظلمه ونايم بلحدي
لا واحد امن اهلي اوياي مدفون بكبر وحدي
وحق زينب يبو السجاد غيرك كل شي ما عندي
بس خدمتك ويانه يحسين لا تنسانه
ــــــــــــــــــــ6ــــــــــــ
لو صار الحشر والناس تركض فازعه بحيره
من كد الرعب والخوف الخادم بيك تفكيره
يل بيدك الجنه ونار والكون وتدابيره
عليك بداعة العباس وجهك عني لا تديره
واعيوني الك ذبلانه يحسين لا تنسانه
ــــــــــــــــ7ـــــــــــــــ
خادم خلصت دنياي اسمي الصار ويه اسمك
واعرف ما تلوحه النار يبن الزهره الايخدمك
احلفك بابنك المذبوح عليك بجاه ضلع امك
ما معقوله يا مولاي تكسر كلبه الايحشمك
يل جبدتك عطشانه يحسين لا تنسانه
ـــــــــــــــــــــــــــــــ
ابو باقر الساعدي
5May 22, 2026 575 11
