ـ🌿🌿🌿🌿🌿🌿🌿
ـ🌿🌿🌿
ـ🌿🌿 #کاناڵ_فەرهەنگی_ژان
ـ🌿
#گۆشێو جە دەسینەو #ژیوای_قەۮیم #هەورامانی
با دەورەی وەڵین پەیت کەروو بەیان
ژيواو نازارا و ڕەسموو قەۮيمیان
گۆش دارە هاوار دڵەی خەمباریم
باپیری کۆڵکێش مسیبەت باریم
یانەش نیان یۆ بە کۆڵ و زەحمەت
بە ڕەنجوو شانەی، خيرەت و هیممەت
بێ وچان کۆشان بە لاشەی کزۆڵ
ژیوايێ سەختش کەردە بێ قەبووڵ
كەی فەرامۆش بۆ وەشی یاتاڵە
ژیوای ویەردەی چننەها ساڵە
ئينە جە نەقڵی پیری ویەردەن
خەڵکی ساۮەپۆش عەمرش سەر بەردەن
خۆراکش پەتڵە و دوێنە و شەلەمین
بەرگش جە پەمە و گڵێمی پەژمین
بە بێڵە و زەنگەن کاڵای زەمینا
بە خەلەهاڕاو ئاساو توەنینا
چۆخە و ڕانک و گجی هەڵاوە
بە دەس ورازیان هەتا کوڵاوە
فەرەنجی و پەسەک چۆخە و ڕانکی کاڵ
بەرگوو هەورامی سەرچەمەی کەماڵ
خیگە و هەڵيزە و هەمکونەو ئاوێ
جە دەسکرداروو باڵا لەولاوێ
کونەڵانوو ئاوێ جیای یەخچاڵێ
یاگێ ماس و دۆ و کەرەو بزەخاڵێ
یەرەکۆچە پایەو ئارگا هەڕينێ
ساجێ ماسۆڵە و تەشتە مسينێ
تاق و تەرواڵە و لاکانوو یانەی
جیای کابێنیتی پەی ئاشپەزخانەی
كەنووڵەی هەڕين یاگێ ئاردەکاش
تفاقش جەم بێ پەی نازارەکاش
تەیمان و نەیجەی تێخەو یانەکەیش
داییم نوور وارێ بەروو بانەکەیش
شۆڵەو چراوێش جە دارئەرخەوان
پەرێ ڕوشنایی تاریڪەو شەوان
قەندانێ چوینێ، پیاڵەی هەڕين
پەی دەسکرداراش هەزارئ ئافەرین
کیسەو تەماکۆیش گڵێمە پەژمينێ
جیای قاقەزجگەرەیش، سەبيلە چوینێ
نەیە جە پەمەی موومشان کێشتەن
پەی کەرەسەشان، نەخششان ڕەشتەن
نەیەی مووم کێشیای جیای نەبڕی
پەی دەورە گێرتەو کڵاش و کڵاش دڕی
دووکە و دووکاوێچ دەزگاو
کاری بێ
کەرەسەو جۆڵای قەۮيم یاری بێ
بە دەفە و هەوجەڕ، پەنجێ نەخشينێ
ڕازنان گڵێم و مەوجێ ڕەنگینێ
تەنافەو دەسوو یارانوو خێڵی
جە مووبزێ بێ جیای بۆکسێڵی
بارووت وەش کریان بە دەسوو وێشا
جە خوڵوو مەڕا، بەرزوو ئا کەشا
مەتێش ڕازنان جە دواڵ و کەمان
یۆ جە دەسینە و سەناتی زەمان
تۆکڵوو هەناری، تێجارەت کریان
بریان سۆنقر و خەلە ئاوریان
ساقەتەماکۆ، مەشهوور بە دەمار
جە ئێراق ئامان، بە کۆڵ و بە بار
پۆسوو گاومێشی، پەی چێرەپاڵا
سەنات هەورامی، خاستەرین کاڵا
تۆکڵوو بەلووی، ڕۆنیاس و ليلەنگ
پەی جل و بەرگی، پەنەش كریان ڕەنگ
خمخانێۆ بیەن دەگاو نوێنی
ماوا و هۆنەروو خاکوو نگینی
چوخە و ڕانک و فەقیانێ چەرمێ
مشکی ئەڵوەنی، ڪڵاشێ نەرمێ
هەنجير و وەزی، باخەکاو دەرەی
پەی زمسانی بێ، وەختوو
شەوچەرەی
ئینەبێ گۆشێو کەرەسەو کارا
دەسینەو ژیواو قەۮيم نازارا
منویسوو هەورام وێش کەفاف زانان
کاڵای خارجیش بە هیچ نەوانان
✍ #ئۆسمان_ڕەحیمی_هەجیجی
🌿
🌿🌿 @KanalZhan
🌿🌿🌿
🌿🌿🌿🌿🌿🌿🌿
Telegram
attach 📎
4September 3, 2026 579 3
