💢💢💢
🔷 حیدربابا
حیدربابا نه کوْل قالیب نه دوشان!
کوشولتولار یاتییب،
چایلار دای آخمیر
قیزلار اونا صف باغلاییب،
دای باخمیر،
قارا گؤیده ایلدیریملار
دای شاخمیر.
حیدربابا تندیرلرده توستو یوخ
سؤنوب اودلار،
کورسولرده ایستی یوخ
عمه جانین، اَرسینین شاپپاسی
چوخ قوجالییب،
شاپپالارین گوجو یوخ.
حیدربابا کهلیکلردن خبر یوخ
اووچو ووروب بو داغلاردان قاچیبلار
داغ قوشلارین،
دیلسیزداشدا آسیبلار
قولاغیمدا سیزیلداییر بو داشلار
قولون سین سین اووچو
گؤزون اَلنسین.
حیدربابا یازدیم آنام دیلینده
هارای هارای،
تورکم اؤزوم، ائلیمده
کیمسه منه هر گون بیر آد قویماسین
تورک ائلینن منی آیری سالماسین.
حیدربابا ایواز گلییب چاتمادی
"شهریارین" ایکی گؤزو یاتمادی
کوراوغلونین الی آتا چاتمادی
قیرآت کئچل الیندهدی،
نینه سین؟
قیلینج چالیب،
آغلاق چؤلو بئلله سین!.
حیدربابا دویغولاریم جوشورلار
زینه زینه داغ دوشوندَن آشیرلار
آشیب منی دنیزلره قوشوللار
دنیزلرده "قارابالیق" اولموشام
اولدوز اولوب قارانلیقدا دورموشام.
حیدربابا ایگید اوغول یورولماز
آنادیلیم زنجیرلرده بوغولماز
قانلی قاندال بوغازیمدا الیمده
من یانماسام،
شانلی سحر دوغولماز.
✍ #ماحمود_دالغا
#ایمگهلر_کانالی
✔️✔️✔️
👇👇👇
https://telegram.me/imgalar
Telegram
ایمگهلَر️
#Ədəbiyyat_incəsənət
«ایمگهلر آخاغی، ادبیات و هنر دۆنیاسیندان دانیشیر»
ادمینله ایلگی:
@yara24255
https://telegram.me/imgalar
@imgalar
2
2September 8, 2026 61 2
