نهى زهرة :
هونها على قلبك..
في حاجات مُقدَّر لها تحصل مهما عافرت، وناس هيخرجوا من حياتك مهما حاولت تتمسّك بيهم، وفُرص مش من نصيبك مهما سعيت لها، وابتلاءات هتيجي فجأة ومن غير ما تكون عامل حسابها..
كل ده وأكتر وارد في الدنيا؛ لأن طبيعتها النقص، فماتنتظرش منها الكمال، ولا تتوقع إن كل حاجة تمشي زي ما أنت عايز.
يقول الله تعالى:
﴿الَّذِي خَلَقَ الْمَوْتَ وَالْحَيَاةَ لِيَبْلُوَكُمْ﴾
#سورة_الملك
الدنيا دار ابتلاء، ومشقة، وكَبَد، والفتن فيها حوالينا من كل ناحية..
وعشان كده، مش هتعرف طعم الراحة والسلام الحقيقي غير لما تفهم طبيعتها، وتقبل إن مش كل اللي تتمناه هيكون خيرك، وترضى بأقدار الله، وتوجّه طاقتك للحاجة اللي تقدر تعملها بدل ما تستهلك نفسك في مقاومة حاجة خرجت من إيدك.
قال #رسول الله ﷺ:
«واعلم أن ما أخطأك لم يكن ليصيبك، وما أصابك لم يكن ليخطئك».
الحياة ممكن تتغيّر في لحظة، وحاجات كتير ممكن تخرج من إيدك من غير سابق إنذار.. لكن ده مش معناه إنك تفضل طول الوقت عايش في خوف من اللي جاي.
ركّز في يومك، اعمل اللي عليك، وسيب لله ما ليس لك فيه يد.
ما كُتب لك سيأتيك، وما لم يُكتب لك لن تناله ولو اجتمعت لك كل الأسباب.. فهونها على قلبك.
«احرص على ما ينفعك، واستعن بالله ولا تعجز».
