የሴት ቡራኬው
“የሴም ቡራኬው እድል ፈንታው አንቺ ነሽ" የሚለው ምስጋና በኢትዮጵያ ኦርቶዶክስ ተዋሕዶ ቤተ ክርስቲያን ሊቃውንት ድርሰት በአባ ሕርያቆስ ቅዳሴ ማርያም እመቤታችን ቅድስት ድንግል ማርያም የምትመሰገንበት ጥልቅ ምሥጢራዊ አባባል ነው።
ይህ አባባል በኦሪት ዘፍጥረት ምዕራፍ 9:26-27 ላይ አባታችን ኖኅ ለልጁ ለሴም ከሰጠው ቡራኬና የርስት/የእድል ፈንታ ተስፋ ጋር የተያያዘ ነው።
የታሪኩና የትንቢቱ መነሻ
ከጥፋት ውኃ በኋላ ኖኅ በልጁ በሴም ምግባርና ትሕትና ደስ ብሎት ሲባርከው፦"የሴም አምላክ እግዚአብሔር ይባረክ... እግዚአብሔር የያፌትን ቦታ ያሰፋ፤ በሴምም ድንኳን ይደር" (ዘፍጥረት 9:26-27) ብሎ ተናገረ። ይህም ኖኅ ለልጁ ለሴም ያስተላለፈው ታላቅ የቃል ኪዳንና የመንፈሳዊ እድል ፈንታ (ርስት) ነበር።
"የሴም እድል ፈንታው አንቺ ነሽ" የሚለው ምሥጢር
በሊቃውንቱ ትርጓሜ መሠረት እመቤታችን የሴም ቡራኬና እድል ፈንታ የተባለችበት ምክንያቶች የሚከተሉት ናቸው፦
የተስፋውና የርስቱ ፍጻሜ በመሆኗ፦ ኖኅ ለሴም የሰጠው እድል ፈንታ (ርስት) ሥጋዊ ምድር ብቻ አልነበረም። አምላክ ከሴም ዘር ተወልዶ በሰው ድንኳን (በሰው ተፈጥሮ) የሚያድርበት ታላቅ የጸጋ እድል ፈንታ ነበር። ከሴም ዘር ተወልደው የመጡት አበው (አብርሃም፣ ይስሐቅ፣ ያዕቆብ፣ ዳዊት) ይህንን የቃል ኪዳን እድል ፈንታ በቅብብሎሽ ሲጠብቁት ኖረው፣ ፍጻሜውን ያገኘው ከሴም ወገን በተገኘችው በድንግል ማርያም ነው።
የመለኮት ማደሪያ (የሴም ድንኳን) በመሆኗ፦ "በሴም ድንኳን ይደር" የተባለው ትንቢት ፍጻሜ ያገኘው አምላክ በእመቤታችን ማኅፀን አድሮ ሰው በሆነ ጊዜ ነው። እመቤታችን መለኮት ያደረባት አማናዊቷ የሴም ድንኳንና የቡራኬው የክብር እድል ፈንታ ናት።
የሰው ልጅ እድል ፈንታ መታደሱ፦ አዳምና ሔዋን በገነት ያጡትን የሕይወት እድል ፈንታና ርስት፣ የሰው ልጅ መልሶ ያገኘው ከሴም ዘር በተገኘችው በድንግል ማርያም አማካኝነት ክርስቶስ በመወለዱ ነው።
3. በአርጋኖን ድርሰት ያለው አጠቃቀም
አባ ሕርያቆስ በድርሰቱ እመቤታችንን የአባቶች ሁሉ የተስፋቸው ፍጻሜ እያደረጉ ሲያመሰግኗት፦ "ቡራኬሁ ለሴም ወክፍል ሎቱ..." የሴም ቡሬኬው ዕድል ፈንታው አንቺ ነሽ’ እያሉ አባቶች በትውልድ ሲጠብቁት የነበረው የመንፈሳዊ በረከት እድል ፈንታ በእሷ መገለጡን ያመሰጥራሉ።
"የሴም ቡራኬው እድል ፈንታው አንቺ ነሽ" ሲባል፦ ኖኅ ለሴም የተናገረውና አባቶች ሲጠብቁት የኖሩት "አምላክ በሰው ድንኳን ይደራል" የሚለው የቃል ኪዳንና የጸጋ እድል ፈንታ፣ ከሴም ዘር በተገኘችው በድንግል ማርያም ማኅፀን አምላክ ሰው በመሆኑ የዚያ ታላቅ አባታዊ ቡራኬና ተስፋ አማናዊ ፍጻሜና ርስት አንቺ ነሽ ማለት ነው።
ንዋይ ካሳሁን
11August 27, 2026 1.3K 4
