صباح الخير.
لأن نحن مجتمع ذكوري، فكوني شاب هاد شيء أعطاني بشكل تلقائي شوية امتيازات اضافية عن أختي من قبل أهلي من ناحية اعطاء الحرية وكدا.
هالشي أزعجني فترة، لأن أنا مش حابب كون جزء من هالمنظومة، ما بدي التمييز الإيجابي تماما بنفس مبدأ عدم الرغبة بالتمييز السلبي، كله تمييز وانا ما بدي اياه سواء كان إيجابي أم سلبي.
فكّرت شوي، وسألت نفسي: "شو الخيار البديل؟" انو لو أهلي ما كان عندهن تمييز إيجابي للذكور، ما النتيجة؟ النتيجة هي انو اتعامل بنفس الطريقة الأسوأ يلي تُعامَل بها أختي، طيب اوك، الآن، شو استفدنا إذا نحن التنين تعاملنا بطريقة مش أحسن شيء؟ انو وين الغاية من ذلك؟ ليه لحتى انا أزعل إذا كان أحدنا عم يتعامل بطريقة أفضل؟ انو مو هاد الخيار الأحسن؟
من كم يوم، بحديث مع الإنسان القلبي، عبرلي أنو هو عائلته كمان مش أحسن حاجة تعاملهن، وهو بيدرس بغير محافظة، قلي انو مش حاسس بالراحة يترك البيت ويترك اخواته مع اهله ويروح هو يسافر لجامعته ومكأنو ولا هامّه شي. قلتلو أنو لا إحساسك مش صح، لأن ليه نحن نفضّل ونتمنى خيار أنو انا كمان بدي عاني مع الآخرين؟ وين الهدف من ذلك؟ أنو اي لنفترض انو نحن فضّلنا ذلك ورحنا حققناه، ماذا إذا؟ شو الفائدة؟ مو لما نحن نكون مش عم نغرق مع الآخر منقدر نساعده أكثر بكثير لو كنا عم نغرق معه ونحن التنين بدنا مين يساعدنا؟
أنا، أو صديقي، أو أي إنسان آخر، ممكن يمر بهيك موقف، موقف يكون فيه الإنسان بحكم الظروف تخلص من معاناة معينة غيره لسا ما تخلص منها، بس هو كان محظوظ مثلا. بوقتها، خلينا نأخذ شهيق زفير، ونفكر قليلا، ليش انا عم أتحسر لأني ما عشت هالمعاناة؟ هل المعاناة شي حلو وبستمتع فيه لحتى زعلان اني ما جربته او اني تخلصت منه؟ طيب أنا حاليا زعلان على غيري يلي عم يعيش هالمعاناة ومتعاطف معه، مو أول خطوة لحتى ساعده إني كون قادر على ذلك، ومو عدم تعرضي للمعاناة معه هو شيء بيرفع من نسبة أن أساعده؟
لذلك يا أصدقائي، لما مرة أخرى نعرف أنو في كائن حي تعرض لمعاناة نحن عُفينا منها، سواء كنا منعرفه معرفة شخصية أم لا، وسواء كان حيوان أو إنسان، دعونا نسأل أنفسنا أسئلة مثل: "كيف ممكن نحجّم هالمعاناة وما نخليها تتفاقم؟"، "هل أفعالي وأفكاري يلي حآخدها ستؤثر عليي سلبا وتزيد من المعاناة الكلية؟ وهل الطرف الآخر يلي عم يعاني سيكون سادي لدرجة يفضّل ذلك؟".
بالمقابل، أنا كمان لما مر بظروف فيها معاناة، من الحكمة ومن حب الخير للغير أنو ما يكون بدي الناس يلي بتعرف بهالظروف تعاني معي وتقعد تبكي 24h، يعني عادي لو كنت حاكي ظروفي الصعبة لصديق ثم غدا عرفت انو طلع مشوار وانبسط، مو بس عادي، شخصيا هاد يلي بفضله، بدي هالشخص والناس بشكل عام تتواجد مع بعضها وتكون سند لبعضها، بنفس الوقت ما بدي معاناة أي إنسان تتفاقم وتكبر، بل بدي اياها تتحجّم وتصغر فتتلاشى، وهالشي بظن انه بصير عن طريق اتباع القاعدة يلي حكيت عنها بهالبوست، قاعدة "عدم جعل معاناة الآخربن تؤثر عليي سلبّا، وعدم جعل معاناتي تؤثر سلبًا على الآخرين. + عدم التحسر على فكرة أنني لم أعش مع الآخر معاناته، بل الامتنان لذلك لأنه به أصبح أكثر قدرة على مساعدة من يُعاني". ابقوا بخير. 🤍
9
5
2September 3, 2026 148 2
