تم أخد هالصورة أثناء مشواري قبل شوي يلي رحت جبت فيه ليمون لأغليه لنفسي لأني مرضان، وهالمشوار ما كان الأول من نوعه بفترة المرض، فقبله رحت جبت خبز، وبعده رحت جبت اغراض، ومبارح كمان تم محاولة افعل اشيا، ونجحت ببعضها، رغم التعب الجسدي.
هالشي يمكن الكثيرون يشوفوه بسيط، انو بالنهاية انا ما رحت جبت ليمون من غير قارة، ولا كان مرضي هداك المرض الخطير، وصح، معهن حق بذلك، كمان بالمقابل مش من الغلط قول جملة "انا رحت وجبت دوا واشيا لنفسي رغم المرض".
تذكرت بذلك أنو شقد الكثير من البشر عايشين بشكل اعتمادي عغيرهن، أكيد لابأس ومن الجيد والرائع إذا أحد افراد عائلتي أو أصدقائي فعل لي شيء أو قدم لي خدمة، أو العكس هو ما حدث، انو انا يلي قدمت له خدمة. ولكن، لما يصير الموضوع بشكل انو نحن ما منقدر نفعل شيء معين بدون الطرف الآخر ونحن محتاجين له حاجة ماسّة شديدة ضرورية لتحقق الغاية، فهون المشكلة.
عادي انو الرجل هو يلي يصرف عالبيت، او المرأة هي يلي تهتم بأمور المنزل، إذا كانوا الطرفان متقبلان بعض وحابين ومرتاحين بهيك علاقة. بس بجهة أخرى، بشوف أنو من الأفضل للرجل يكون بعرف يدبّر أموره بقصص المنزل ولو اتطلق او ما تزوج من الاساس، وهالشي طبعا ما بينقص من رجولته، بل بالعكس، وبشوف كمان من الأفضل للمرأة تكون بتعرف تدبّر قصص شغلها ومصروفها ولو اتطلقت او ما تزوجت من الاساس، وأكيد كمان هالشي بزيد من أنوثتها، ما بينقصها.
الزبدة يلي عم حاول قولها، انو هالموقف اثبتلي بشكل عملي اني مش اعتمادي ومش بحاحة اي حدا بأي شي، فانا بنفس مبدأ "رحت جبت اغراض رغم المرض" فيني رجّح انو يمكنني القيام ب"'الطبخ بعد الشغل" او "ضب البيت رغم التعب" او "الغسيل رغم انو اليوم عطلة ويفترض يكون يوم راحتي" او ... إلخ.
أكيد التعبير عن الحاجات شي جميل، وحاكي عنه من قبل ومستفيض فيه، بس بظن كمان انو من الأحسن يمتلك الإنسان قدرة على الاعتماد عنفسه، أكيد من الصح والحلو نعبر عن حاجاتنا لحدا مرات ومرات، كمان من الصح يكون عنا القدرة والرغبة على تلبية حاجاتنا -ولو شوي بصعوبة اكبر- من دون حاجة حدا.
انا بعرف ومدرك انو الناس لبعضها، وفيه ناس جد بتحب تساعد بعضها وبتُسعد لما تقدم أي مساعدة، وانا منهم، أيضا انا مدرك انو ما حدا دائم لحدا، واحيانا سنضطر نعتمد عحالنا بشيء نحن تعودنا حدا يعمله نيابة عننا، فالسؤال هون بصير، انو اذا انا عندي القدرة على فعل هالشي وفي امكانية اني ما اتعود على انو فلان يعمله نيابة عني، فليه لحتى اتعود عذلك؟ انو مو يمكن لازم شوي زيادة نحسب حساب الفترة يلي هالفلان لن يكون متواجد فيها لسبب أو لآخر؟
اي فهيك، مو غلط ابدا انه نساعد بعض بفعل شيء ما، الغلط أنو نتعود عذلك، الغلط نفكر أنو إذا فلان ما ساعدنا فنحن غير قادرين على فعل هالشي لوحدنا. ابقوا بخير. 🤍
13
9August 30, 2026 231
