ليش دايمًا بنأجل الصلاة؟
الأذان يأذن ، وبنقول : بعد شوي بصلي
وبعد شوي نمسك التلفون ، ننشغل ، نحكي مع حدا ، أو نكون قاعدين ومش إلنا خلق نقوم وبتمر الدقائق وإحنا مش منتبهين .
بس خلينا نوقف هون شوي ونفكر . الصلاة اللي بنأجلها عشان شغلة بسيطة ، هي نفسها الصلاة اللي ربنا فرضها علينا، وهي من أهم الأشياء بحياتنا .
قال الله تعالى :
﴿إِنَّ الصَّلَاةَ كَانَتْ عَلَى الْمُؤْمِنِينَ كِتَابًا مَوْقُوتًا﴾
يعني إلها وقت ، مش كل ما فضينا بنصلي .
والمشكلة إنه التأجيل إذا تعودنا عليه بصير عادي عندنا ، اليوم بنأخرها شوي ، بكرا بنأخرها أكثر ، وبعدها ممكن الواحد يتركها وهو مش حاسس .
فإذا أذن عليك، حاول تقوم على طول لا تستنى (بعد شوي) لأنه يمكن بعد شوي تنشغل ويمكن تنسى وإحنا أصلًا ما بنعرف قديش إلنا من العمر .
وإذا كنت مقصر بالصلاة ، لا تقول خلص أنا بعيد وما بنفع أرجع . ارجع من هسا ، حتى لو وقعت قبل المهم إنك تحاول وما تستسلم .
قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِن رَّحْمَةِ اللَّهِ ۚ إِنَّ اللَّهَ يَغْفِرُ الذُّنُوبَ جَمِيعًا ۚ إِنَّهُ هُوَ الْغَفُورُ الرَّحِيمُ﴾
[الزمر: 53].
