"ЖАҢА КОНСТИТУЦИЯ: ӘДІЛЕТТІ ҚАЗАҚСТАННЫҢ БЕРІК НЕГІЗІ»
Қазақстан Республикасының жаңа Конституциясының күшіне енуі қарсаңында Д. Серікбаев атындағы Шығыс Қазақстан техникалық университетінде «Жаңа Конституция: Әділетті Қазақстанның берік негізі» тақырыбында дөңгелек үстел өтті.
Іс-шараның модераторы Шығыс Қазақстан облысының әкімі Нұрымбет Сақтағанов болды. Дөңгелек үстел жұмысына облыс әкімдігінің өкілдері, ғылыми және сарапшылық қауымдастық, жоғары оқу орындарының басшылары мен ғалымдары, Қазақстан Республикасы Адам құқықтары жөніндегі уәкілінің институты, Қоғамдық кеңес, саяси партиялар, қоғамдық ұйымдар және қоғамдық пікір көшбасшылары қатысты.
Кездесу барысында жаңа Конституцияны іске асыру, заң үстемдігін нығайту, азаматтық қоғам институттарын дамыту, азаматтардың құқықтарын қорғау, жастардың азаматтық жауапкершілігі мен отансүйгіштік қасиеттерін қалыптастыру, сондай-ақ тарихи-мәдени мұраны сақтау мәселелері жан-жақты талқыланды.
Дөңгелек үстелде жоғары оқу орындарының конституциялық реформаларды іске асырудағы рөліне ерекше назар аударылды.
«Жоғары оқу орындарының конституциялық реформаларды іске асырудағы және Әділетті Қазақстанды қалыптастырудағы рөлі» тақырыбында баяндама жасаған университет ректоры С. Рахметуллина жаңа Конституция адами капиталды, ғылымды, инновациялар мен технологияларды дамытуды мемлекеттік саясаттың стратегиялық басымдығы ретінде айқындайтынын атап өтті. Сонымен қатар «Ғылым және технологиялық саясат туралы» Қазақстан Республикасының Заңы университет ғылымын дамытуға, білім, ғылым және өндірістің ықпалдастығын күшейтуге және жоғары білікті кадрлар даярлауға жаңа мүмкіндіктер ашатынын айтты.
Университеттің ғылыми ұстанымын Қазақстан тарихы және әлеуметтік-саяси пәндер кафедрасының аға оқытушысы, тарих ғылымдарының кандидаты Қ. Калиева таныстырды. Ол жаңа Конституцияның тарихи-мәдени мұраны сақтау, азаматтық бірегейлікті нығайту және жастардың отансүйгіштік тәрбиесін қалыптастырудағы маңызын атап өтіп, Шығыс Қазақстанның бай тарихи мұрасын зерттеу мен насихаттауға бағытталған бастамаларын ұсынды.
Дөңгелек үстел университеттің жаңа Конституцияны іске асыруға, ғылыми-сарапшылық әлеуетті дамытуға және Әділетті Қазақстанның интеллектуалдық негізін нығайтуға қосып отырған үлесін тағы бір мәрте айқындады. «НОВАЯ КОНСТИТУЦИЯ: ФУНДАМЕНТ СПРАВЕДЛИВОГО КАЗАХСТАНА»
2
1
1June 30, 2026 465
