بَطلتـي توحشـيني -p1في الليل والناس نيام والكل في حاله سارح
عدى عليّ الكلام مسنون وحزين وجارح
الست ساعتها غنت في الراديو لسه فاكر
والنحلة النايمة طنت لما صحيوا العساكر
وعساكر الليل دماغي في خناق هيجيبوا داغي
والليل عمال يلاغي والقلب ضعيف وناكر
أكتب عن وصف ألمي ولا عن بعد ناسي
ولا عن حب خدني وشغلني وهو ناسي
الصبح منامه فارقه خلاه هجر السراير
والقلب هيامه سارقه والعقل نشيط وفاير
أنا لما كتبت شعري و وصفت الوحشه ليكي
رخصت بنفسي سعري أملاً شعري يراضيكي
ولقيت ولا شعري نافع ولا قلبي البيت أويكي
عمال ادفع وادافع عن حقي الشخصي فيكي
مش عارف اقول كرهتك
مش عارف اقول ناسيكي
كملتك الف مرة ما نقصتش إلا بيكي
النور شقشق ولالا والحالة تجر حالة
والهم اللي في فؤادي واصل لله تعالى
هو العالم بأمري وبفعلي طول سنيني
هو العارف بأني كاتم في الليل أنيني
كان نفسي تحسي بيّ كان غرضي تفهميني
تمحي الحزن اللي فيَّ تتراضي وتراضيني
وادي الحزن اللي خدته والجرح اللي اعتمدته
بيقول قلبي بإرادته بطلتي توحشيني
.لــ مَاجـد .
