أعزائي طلاب الناصرية (مديرية تربية ذي قار) 🌷
أكيد كلكم شفتوا القرار اللي صدر هالسنة بخصوص إضافة مادة اللغة الفرنسية واللي كان مختلف عن السنوات السابقة لأن قبل ما كان أكو اختبار ولا شرط أن تكون مدرسة الطالب بيها صف فرنسي.
وأعرف أن هواية منكم انصدموا من القرار وإحنا هم مثلكم ما كنا متوقعين يصير هيچ وخصوصًا أن أكثر المتضررين هم طلاب الأقضية والمناطق البعيدة لأن مو كل طالب عنده مدرسة قريبة تدرّس اللغة الفرنسية.
أمانةً طلاب الحل مو بيدي ولا بيد أي شخص بعيد عن المديرية. إحنا نكدر نحچي ونوضح المشكلة لكن بالنهاية أنتم وأولياء أموركم الأقرب للمديرية والأقدر على شرح ظروفكم بصورة مباشرة.
لذلك اقتراحي بكل بساطة أن مجموعة من الطلاب وأولياء أمورهم يراجعون المديرية بصورة رسمية ويعرضون المشكلة على المسؤولين ويوضحون إلهم ظروف الطلاب وخصوصًا طلاب الأقضية البعيدة ويسألون عن إمكانية إيجاد حل مناسب إلهم.
المقصود هو مراجعة طبيعية للمديرية وطرح المشكلة بالحوار والطرق الرسمية مثل أي موضوع يحتاج استفسار أو إعادة نظر.
لأن الكلام بالتلغرام وباقي المنصات وحده ما راح يوصل تفاصيل المشكلة مثل ما توصل لما الطالب أو ولي أمره يشرحها مباشرة للمسؤولين.
وإن شاء الله نتأمل خير من مديرية تربية ذي قار ونأمل أنهم يسمعون منكم ويتفهمون ظروفكم ويلكون حل يحفظ تعبكم وجهدكم.
24
2August 25, 2026 202 3
