اضحك وابتسم عيش بغرام.الليل
لتعكر مزاجك والكلب يفلان
اني الاعتذر منك واطخ الراس
حقك.بالزعل،لو حتى ماغلطان
ورده انت ونداريك بكلب والعين
ونقدملك عمر بس الشرط فرحان
تتدلل علينا وحقك انت بهاي
قِطيفة انت وتحسب الزاد كالنقصان
شفق حُبي، ودخلت بروحي مدري شلون
مثل شفق بسما وتتلاكه بي الوان
رغم كل الغرور الجان بيه ودام
اسف يلحك اسف، كون ما حزنان
من تزعل برود الكون بيك يصير
صقيع انت؟ نسيم وهاب من الريح؟
انت انسان؟.لو ديسمبر العنوان
اضحك فدوه لله الضحكه بيها الروح
واذا رايد تعاتب صاغيه الاذان
اغلط واتهم واحجي التريده وكول
الاهم كلش تسولف تكسر الكتمان
يبعد اني وبعد كل السوالف ذيج
لاتذبل يوردة بريحة الريحان
يا اسمر يادعج يابو حاجب سيف
يهيبة شيخ يامسج وطعم رمان
قرر شنهو بيهم يرضي بيك الروح
نراضيك بغزل؟ بالبوسة؟ بالاحضان؟
ولو رايد،بعد نفتحلك الميدان
ونطش اشعار مو جكليت ع الزعلان
9November 7, 2025 291 2
