سبع وجوه عندك مو بشر من طين
جن قوس القزح الوان المحير
جنك روج ماي بدجلة نص الليل
من توصل جرف بالظلمة تتستر
يالريحك غدر ويه المكر مخلوط
واظن بيك الخيانة اهواي تتاثر
شيطانك صعب مدري انت رس شيطان
تلاكيني بتواضع فجأة تتكبر
تبينلي نده ومتطشر اعله الروح
وراه بساعه مني الكاك تتبخر
طبعك حيل متعب بدله.منه ارتاح
مثل جلد السحالي، اللون يتغير
تغلط بالالف غلطه وتريد انساك
ومن انساك ترجع يمي تتعذر
مو كافي تناقض ارحم بهلحال
لو رايد تظل لو روح لاتنغر
غرورك هذا ماينفع ندوم سنين
انت ايام واشهر هيج تتكدر
انت وعشرتك بالماي تنشمرون
ولوقات المسامر تبقى تتحسر
حاسبني ذليل بحبك افدي الروح
جربني اذا بين الكرامه وبينك اتخير
احرك ماي ،اخلي الليل نص انهار
وخلي الناس ليلة عيد تتسحر
واشَوف عيونك الدمعات عالمضبوط
واخلي الدنيا ترعد والوجه يصفر
8July 13, 2025 378 1
