نشرو بالتواصل شاعر واشعار
قصايد بالشعر يتغزل بمحبوب
غزل فاحش تسمعه بكل صلافة عين
واعلامية تضحك والوضع مكلوب
حجي فاضح كلام يطيّر النيات
سوالف كشرة مايكدر يضمها الثوب
كلام يفشل الموجود والغايب
ماعنده اليكله الكلمة بيها عيوب
اعلامية فرحانه وتساير عود
تضحك باللقاء اتكله عفيه انوب
سخافه وي الشعر ترهم شلون يصير
كلام اعلل الهزل مو ع الشعر محسوب
حسافه اعللزمن صار الشعر مهزول
غزل عذري تِنحَّه والفحش مطلوب
سوالف فاشله صعدتها الترندات
حجي تافه كلام امسطر ومكتوب
جان الشاعر ايوصل رسايل دوم
بس بهلوكت صار الحجي مضروب
ماهمهم طفل لا فشله كالو يوم
عدهم بالمهم افلوسهم بجيوب
وبعيد من الشعر شوف الينشره شلون
مافكر يشوفه الجاهل الملعوب
صوج الناس تصعد عالم بكم لايك
توصل هلسوالف من ورا هلبوب
سجنو كل سخيف وتافهه ينشرون
سجنوهم عِبر بلكي الشباب تتوب
ماندري ابن ادم ابد ميخاف
لو شاف البشر متعلك اومسلوب
9July 12, 2025 275
