#دنیا_چێشەنی
دنیا چێشەنی، چێش جە بارتەن
جەفات دیارەن، خەم سەر بارتەن
دیارەن چەرخی سیای لوول وەردەت
شاهێدٚەن پەرێم مێژوی ویەردەت
هەر چن دیانی پەی دەور و چەرخیت
نەدٚیم، نەزانام، بارێو و نەرخیت
ها جە تاریکی ژیواو دەورانیت
دڵ تەوەسیانەو جە بێ سامانیت
ویەردەی دەورت گرد بێ وەفا بێ
سەراپا مەینەت، زەجر و جەفا بێ
هەر جۆر چەرخیەی لار و لەنگەنی
بارێوت نیەن ڕەنگا و ڕەنگەنی
ژیوای چەنی تۆ هەرسەر و واربێ
ڕۆ بە ڕۆ بەدٚتەر ژیوای نابار بێ
بازارت گەرم و دایێم پەڕ سۆز بی
دەورت سەراسەر هەر تەپ و تۆز بی
نەدٚات بە کەسی دەورش تا وە سەر
جە نیمەڕانە ڕەنجت کەرد بێوەر
شەرتەن چەنی تۆ نەبوونە بە یار
سۆچنات جەرگم بەئێش و ئازار
مەنازە بە وێت مێحنەتسەرانی
پەی گردین عالەم، پەڕ ماجەرانی
هەر وەڵادیم بی ئارۆ و سەباتەن
ئامانەتەنی خالق وێش واتەن
«مورید» نەوەری حەسرەتوو دنیای
نامی نیک وەشەن، بازینە جیای
هەر جە ڕاگەی ڕاس کرداری بێ
عەیب
بیەن بە پایەو ئینسانی جە غەیب
✍ #ئوسمان_ڕەحیمی_هەجیجی
2
1September 6, 2026 209
