قصيدة دفن الأجساد المقدسة .. للامام زين العابدين السجاد ع
بـثالث النوح...أدفنك يا حبيبي
بدمعة الروح...أدفنك ياحبيبي
وسط گبرك أنزلك
على نحرك أقبلك...ياحبيبي
.........
من أجيتك...لطـــــفوف من اليسُر
شفت منك...مطشره عظام الصدُر
هنانه أيدك بس شفت ناقصهه إصبِع
وبحصيره ضلوع صدرك گمت اجمِع
دمعي هـــمال...بديه شلون اشيلك
مگطع أوصال...بديه شلون اشيلك
حِرت مابين احملَك
على نحـــرك أقبلك...ياحبيبي
..........
عِفت زينب...مادَرَت جاي الدفن
لون تــدري...تــــجي ويّايه أظن
ريحة الخــــوّه تدليهه اعله جسمك
تجي وتصبغ للوجه من فيض دمك
خايف تمـوت...إذا حاچاهه نحرك
تردَك ابصوت....إذا حاچاهه نحرك
يريت ابإيدي اجَـبلَك
على نحـــرك أقبــلك....ياحبيبي
.........
جايب وياي...ماي اشرُّب مَنحرك
أسمع تگول...يبني شنهو الأخرك
بدمعي أگلك چنــت يم الفاطميه
بحضني چانت نايمه أختي رقيّه
خايف اتفز...تگلي وين أبويه
چلمه وتعز...تگلي وين أبويه
تصيح وتسأل أهلك
على نحـــرك أقبلك...ياحبيبي
.........
بيدي گبــرك...أحفر ودمعي يهل
وانه اسولف...عالحبال وعالهزل
حاله مَرَّت عمتي والله شـصعُبهه
بويه واحد بالرمح شفته ضربهه
وانه معلول...حسيناً واحسينا
اسمع تگول...حسيناً واحسينا
ونيابه جيــت أگلك
على نحـــرك أقبلك....ياحبيبي
.........
أحمِل وياي...شـويّــه من أغله دموع
من العقيله...أرد ارشهه اعله الضلوع
حته تشتَم عطر لحجاب الحبيبه
عمّـتــي المدللـه صارت غــــريبه
سـلّبوهه...بعد عين ابو فاضل
شتموهه...بعد عين ابو فاضل
بدمع عمتي أغسلَك
على نحـــرك أقبلك....ياحبيبي
الشاعر حاتم صبري الكاظمي
13
5June 27, 2026 3.2K 26
