تقريبًا كل نماذج الذكاء الاصطناعي طلعت يسارية ليبرالية حتى الصينية، والاستثناء الوحيد تقريبًا Grok 😂
من 2023 والباحثين يجربون من وقت لوقت يمررون نماذج الذكاء الاصطناعي على اختبار Political Compass الشهير.
الاختبار فكرته بسيطة:
يعطيك مجموعة عبارات وتختار:
موافق جدًا / موافق / غير موافق / غير موافق جدًا
وبعدها يحطك على محورين:
اقتصادي: يسار ↔ يمين
اجتماعي: سلطوي ↔ ليبرالي/تحرري
طيب ليش أصلًا هذا مهم؟
لأن نماذج الذكاء الاصطناعي تتكلم يوميًا مع ملايين الناس في مواضيع فيها سياسة واقتصاد ومجتمع.
ولو كانت تميل بشكل ثابت لاتجاه معين، فالتأثير المحتمل على آراء الناس ممكن يكون ضخم جدًا، أكبر بكثير من تأثير وسائل إعلام تقليدية كاملة.
المهم، مؤخرًا ظهر اختبار جديد على aipolcom.net وقرروا يعيدون التجربة لكن بطريقة أدق بكثير من التجارب القديمة.
أول شيء، اختبروا النماذج مباشرة عن طريق الـ API بدل واجهات المحادثة.
ثاني شيء، ما سووا اختبار واحد لكل نموذج وخلاص.
سووا خمس جولات على الأقل لكل نموذج.
وهذي نقطة مهمة لأن جولة وحدة ممكن تطلع شاذة.
وفعلًا لما حسبوا المتوسط على خمس جولات، أغلب النماذج تحركت بشكل بسيط جدًا، لكن Grok تغير مكانه بشكل واضح.
يعني لو اعتمدوا على جولة وحدة، نتيجة Grok تحديدًا كانت بتكون مضللة جدًا.
ثالث شيء، جربوا نفس الأسئلة من خلال طريقتين مختلفتين للوصول للنماذج: مباشرة ومن خلال api.
والنتائج تقريبًا نفسها.
رابع شيء، حاولوا يتأكدون إن المشكلة مو من الاختبار نفسه.
خلوا الإجابات عشوائية تمامًا، يعني اختيار بدون أي معنى، والنتيجة طلعت تقريبًا نفس الشيء.
لو الاختبار نفسه منحاز تلقائيًا لليسار، حتى الإجابات العشوائية كان المفروض تنسحب لليسار.
لكن هذا ما حصل.
خامس شيء، غيروا صياغة بعض الأسئلة وعكسوها.
مثلا بدل:
«الأغنياء يدفعون ضرائب كثيرة جدًا»
تصير:
«الأغنياء يدفعون ضرائب قليلة»
وبرضه غيروا ترتيب الخيارات، علشان يتأكدون إن النموذج مو بس يختار أول إجابة بشكل آلي.
وسووا اختبارات إضافية كثيرة غيرها.
يعني باختصار الرجال تعبوا على التجربة فعلًا.
والنتيجة؟
تقريبًا كل النماذج وقعت في الربع اليساري الليبرالي.
اقتصاديًا تميل أكثر لإعادة توزيع الثروة والتنظيم الحكومي.
واجتماعيًا تميل للحريات الفردية أكثر وترفض الرقابة والسيطرة الحكومية الصارمة.
وحتى النماذج الصينية طلعت بنفس الاتجاه تقريبًا 😂
واضح إن موضوع التقطير من النماذج الغربية وصل أبعد من المتوقع.
ومع ذلك فيه اختلافات بينهم.
مثلا GPT-4o وKimi كانوا أبعد شوي عن المنتصف.
اما Gemini كان من أكثر النماذج قربًا للوسط.
و Claude وGLM الصينية كانوا أميل شوي للسلطوية مقارنة بالبقية، لكن مو بشكل كبير.
وهذي مضحكة شوي لأن Claude في تجربة ثانية لمحاكاة المدن كان برضه يميل للنظام الصارم والانضباط، ومستعد يستخدم القوة إذا احتاج يحافظ على النظام
الاستثناء الحقيقي تقريبًا هو Grok.
هو النموذج الوحيد اللي خرج من المربع اليساري.
لكن حتى هو مو يميني بشكل قوي.
تقريبًا قريب جدًا من المنتصف.
المشكلة إن نتائجه بين جولة والثانية متقلبة بشكل كبير.
وممكن السبب يكون التعديلات اليدوية اللي تسويها xAI بعد كل فضيحة للنموذج.
خصوصًا إن سبق وصار جدل بسبب تدخل إيلون ماسك شخصيًا لتغيير طريقة إجابة Grok على بعض الأسئلة.
وفي ملاحظة ثانية مثيرة للاهتمام:
واحد على X لاحظ إن لما تشغل وضع التفكير العميق أو Reasoning، بعض النماذج تتحرك شوي باتجاه اليمين.
وهذا واضح مثلًا مع Claude Sonnet 4.6 وOpus 5.
وهنا الواحد يتحمس يقول:
كل ما النموذج يفكر أكثر يصير يميني أكثر 😂
هل فعلًا فيه علاقة؟
ولا مجرد صدفة؟
ولا أصلًا الاختبار نفسه فيه تحيز؟
كل واحد يحكم حسب توجهه السياسي
بالنسبة لنا فيه نتيجتين عملية من الموضوع:
الأولى:
لاتتعامل مع أي نموذج ذكاء اصطناعي كأنه حكم محايد تمامًا في السياسة.
إذا بتناقشه في موضوع سياسي، الأفضل تطلب منه يعرض لك أكثر من منظور وحجج الطرفين، بدل ما تخليه يعطيك اتجاه واحد وكأنه الحقيقة المطلقة.
والثانية:
كل سباق الذكاء الاصطناعي العالمي هذا، وتريليونات الدولارات اللي تنصرف
وفي النهاية قاعدين نصنع عشرات النسخ المختلفة من نفس الديناصور الليبرالي 😂
2
1
1
1August 30, 2026 699 2 3
