و دا الدرب الكلاسيكي للطبيب السوداني وهو درب ما قصير و بياخد زمن و ممكن يوفر قروش للامتحانات و فوائد اخري، زي سهولة التقديم لفيزا امريكا، خبرة في نظام صحي جديد، ممارسة اللغة الانجليزية بصورة افضل و ربما جنسية و جواز جديدين للراغبين. و يمكن كمان تلقي احلام جديدة و انسب بالنسبة ليك.
بس برضو ممكن تطش او تطفش من درب امريكا، لانه القروش بتجري في يدك و ظروف المعيشة في البلد البديل ما بسوؤ الوضع في السودان، التزاماتك تجاه اهلك في السودان بتزيد و ممكن تتمدد لانها تاخد معظم دخلك. بالاضافة لانه ممكن تدخل دوامة النبطشيات و الشعل و متطلبات البلد المهنية، فاذا ما كانت عزيمتك قوية و هدفك واضح بروح ليك الدرب في الموية.
الخيارات الاشهر هي قطر، ايرلندا و دول الخليج الاخرى. و لكل مزاياه و عيوبه.
ممكن اضيف بوست كتبته السنة الفاتت للمقارنة. الرابط في التعليقات👇
✨ تجربتي: حاولت استفيد من امتحان Step 2 CK اول و معاه امتحان IELTS و قدمت لمؤسسة حمد الطبية- قطر. و مشيت الانترفيو بس ربنا ما سهلها. محاولات جادة للبحث عن اقامة في الامارات ما نجحت.
الامور اتسهلت لايرلندا و من هناك الفيزا و القروش و تكاليف المعيشة لاسبوعين اتدبرت بعد اقل من سنة. و مشيت امتحنت Step 2 CS في شيكاغو في 2016.
و كمان اتسهلت و استفدت من باقي و الوقت هناك و لفيت 4 ولايات بحثا عن اجابات لحاجات كنت محتاج اعرف عنها اكتر قبل ما اقرر قرار الهجرة.
#كسرة: تجربة الزيارة لأمريكا غيرت كتير في قناعاتي تجاه الحلم الامريكي، و وجدت انه ما الخيار الافضل بالنسبة لي. و انتقلت من ايرلندا الي بريطانيا منذ 2017 و انا مقتنع و راضٍ و الحمدلله.
💫 الخلاصة :
القروش بتتجازف. انت بس اعرف روحك داير شنو بالضبط، و اشرك الناس البهموك في رؤيتك و اهدافك. اتوكل واسعي و الدرب كان طال و كان قصر بتوصل في النهاية. ما المهم انك تصل كيف! المهم تكون عارف نفسك داير شنو و مؤمن بخياراتك و قدراتك.
حتي بعد ما تعقد العزم و تبدأ طريقك، قيم وضعك كل فترة و غير استراتيجياتك و خططك في الحياة عشان تواكب ظروفك. و ما تنسي انه كل البتعمل فيه دا خصما علي عمرك و التجارب البتعملها دي هي البتشكل شخصيتك و الالوان البترسم بيها لوحة حياتك.
بالتوفيق يا صديقي🫰
تحياتي أخوكم/ Ahmed Ali A. Osman
#ودمتم_سالمين🌹
#رمضان_كريم🌛
