បុរី វិមានសំណាង សហការជាមួយក្រុមហ៊ុនមូលបត្រ កាណាឌីយ៉ា រៀបចំកម្មវិធីរ៉ូដសូ (Roadshow) ស្តីពី «ការបោះផ្សាយលក់មូលបត្រកម្មសិទ្ធិជាសាធារណៈលើកដំបូង (IPO)» ប្រកបដោយជោគជ័យ និងទទួលបានការគាំទ្រយ៉ាងខ្លាំងពីអ្នកវិនិយោគ
រាជធានីភ្នំពេញ នាថ្ងៃរសៀល ថ្ងៃទី០២ ខែកញ្ញា ឆ្នាំ២០២៦ នេះ នៅអាគារ Elyse កោះពេជ្យ បុរី វិមានសំណាង បានសហការយ៉ាងជិតស្និទ្ធជាមួយ ក្រុមហ៊ុនមូលបត្រ កាណាឌីយ៉ា (Canadia Securities) រៀបចំកម្មវិធីរ៉ូដសូ (Roadshow) យ៉ាងអធិកអធម ស្តីពីការបោះផ្សាយលក់មូលបត្រកម្មសិទ្ធិជាសាធារណៈលើកដំបូង (IPO) ក្រោមអធិបតីភាពដ៏ខ្ពង់ខ្ពស់របស់ លោកឧកញ៉ាបណ្ឌិត គីម ហ៊ាង ប្រធានក្រុមប្រឹក្សាភិបាលប្រតិបត្តិនៃ បុរី វិមានសំណាង ព្រមទាំងមានការចូលរួមពីសំណាក់វិនិយោគិន ធុរជន និងភ្ញៀវកិត្តិយសយ៉ាងច្រើនកុះករ។
កម្មវិធីនេះត្រូវបានរៀបចំឡើងក្នុងគោលបំណងបង្ហាញពីចក្ខុវិស័យវែងឆ្ងាយ ភាពរឹងមាំផ្នែកហិរញ្ញវត្ថុ និងកម្លាំងកំណើនសេដ្ឋកិច្ចរបស់ បុរី វិមានសំណាង ព្រមទាំងផ្តល់ឱកាសមាសដល់សាធារណជន និងវិនិយោគិនក្នុងការចូលរួមចំណែកធ្វើជាម្ចាស់អាជីវកម្ម និងទទួល បានផលចំណេញខ្ពស់តាមរយៈការវិនិយោគលើភាគហ៊ុនរបស់ក្រុមហ៊ុន។
នៅក្នុងឱកាសពិសេសនេះ ក្រុមហ៊ុនបានដាក់ចេញនូវ អត្ថប្រយោជន៍ហិរញ្ញវត្ថុយ៉ាងពិសេសមិនធ្លាប់មាន សម្រាប់អ្នកវិនិយោគដែលបានចូលរួម និងសម្រេចចិត្តទិញចាប់ពី ១០,០០០ ភាគហ៊ុន ឡើងទៅ រួមមាន៖
ទទួលបានសាច់ប្រាក់ត្រឡប់មកវិញ (Cash Back) 5% ភ្លាមៗ៖ នៅពេលដែលក្រុមហ៊ុនចុះបញ្ជី និងឡើងផ្សារមូលបត្រកម្ពុជា (CSX) ផ្លូវការ។
ការធានាភាគលាភប្រចាំឆ្នាំ (Guaranteed Annual Dividend)៖ ទទួលបានការធានាផលតបស្នងជាភាគលាភប្រចាំឆ្នាំរហូតដល់ 8% រយៈពេល៥ឆ្នាំ ប្រកបដោយទំនុកចិត្ត និងសុវត្ថិភាពខ្ពស់។
លោកឧកញ៉ាបណ្ឌិត គីម ហ៊ាង ប្រធានក្រុមប្រឹក្សាភិបាលប្រតិបត្តិនៃ បុរី វិមានសំណាង បានមានប្រសាសន៍ថា៖ «ការបោះផ្សាយលក់មូលបត្រកម្មសិទ្ធិជាសាធារណៈ (IPO) នាពេលនេះ គឺជាជំហានប្រវត្តិសាស្ត្រដ៏សំខាន់មួយរបស់ បុរី វិមានសំណាង ក្នុងការពង្រីកវិសាលភាពអាជីវកម្ម និងបង្កើនភាពរឹងមាំផ្នែកហិរញ្ញវត្ថុឱ្យកាន់តែមានតម្លាភាព។
យើងខ្ញុំមានសេចក្តីសោមនស្សរីករាយយ៉ាងក្រៃលែង ដែលបានសហការជាមួយក្រុមហ៊ុនមូលបត្រ កាណាឌីយ៉ា ហើយយើងជឿជាក់យ៉ាងមុតមាំថា កញ្ចប់ផលប្រយោជន៍ពិសេស និងការធានាភាគលាភ 8% នេះ និងទំនុកចិត្តខ្ពស់បំផុតជូនដល់បងប្អូនវិនិយោគិនទាំងអស់»។
ព្រឹត្តិការណ៍ Roadshow នេះបានបញ្ចប់ទៅដោយបរិយាកាសរីករាយ និងទទួលបានការចុះឈ្មោះទិញភាគហ៊ុនយ៉ាងច្រើនលើសលប់ពីសំណាក់វិនិយោគិន ដែលនេះជាសញ្ញាណបង្ហាញពីទំនុកចិត្តយ៉ាងខ្លាំងលើការដឹកនាំ និងនាវានៃក្រុមហ៊ុន បុរី វិមានសំណាង លើផ្លូវឆ្ពោះទៅកាន់ការចុះបញ្ជីក្នុងផ្សារមូលបត្រកម្ពុជានាពេលខាងមុខ។
