دوبیتی #لری_مینجایی
"یک"
من و دارِ بلی وا یک براریم
ایما دوتا د یه ایل و تواریم
زمسو دس نیائه ریمو اما
د ای سرما هنی ویر باهاریم...
"دو"
گوتم د افتو اما گیرِ شوئم
دلم خینه ولی هیچی نِموئم
سی چی سیک قفس بائه نصیوم
سی چی لو جو تمارزو توکی اوئم؟
"سه"
گوتن میمونن و وا مه نمَنِن
گوتن دوسن ولی سیم قور کَنِن
تا هاسم مه د لونه بُل بئیرم
اومان و کوگمه وا تیر ونِن!
"چهار"
حق روزه ز دس شو مئیریم
وه ای افتو قسم سامو مئیریم!
مه خواو دیمه که بالابَرز و سوزیم
تَوَریا ا بِهِلن جو مئیریم
"پنج"
تو بی مه شادی سی خُت خوش وهحالت
مه بی تو بیمه کُتکُت خوش وه حالت
گوتم حال مه وا تو خوئه اِ دوس
وریسا رت و وم گُت خوش وه حالت!
"شش"
ولاتی بینه هوکاره تیا تو
چنی آدم ره افتائه دما تو
یه حرفه فرقش اما نونی چَنی
"مه بی تو" فرق داره وا "مه وا تو"!
"علی باجلان"
@delseroo
Forwarded fromدلسرو || علی باجلان
1January 13, 2025 93 2
