كيفاش نستافد من دعم المبادرة الوطنية للتنمية البشرية ؟؟؟
الدعم كيبدا من 10 د المليون تال 100 مليون او اكتر ، حسب نوع المشروع للي عندك .
الناس السلبين ، للي كيقولو المغرب ما فيه ما يدار ،
أو كيقولو هد شي غا كذوب عفاكم غا خرجو من البوست ، حيث ماشي ديالكم 🤏
بسم الله نبدا فالشرح ديال المبادرة الوطنية للتنمية البشرية للناس الواعية ، وللي مهتمة بالموضوع ❤️
✅️اول حاجة المبادرة الوطنية للتنمية البشرية طلقها الملك سنة 2005 ولي الهدف ديالها هو توفير فرص للشغل و دعم حاملين المشاريع المدرة للدخل.
✅️المبادرة باش نكون صادق كتر الا ماكنتيش نوع لي صبار و قادر تكرفض شوية فالإدارة العمومية راك ماغديش تكمل وماغديش تصبر وتجي تقول المغرب حكار و مافيه مايدار... خليك متفائل واجابي .
وغا جرب مغادي تخسر والو،. كيف ما جربو للي قبلك وربي جاب لهم التيسير، فمن يتوكل على الله فهو حسبه ♥️
✅️متسمعوش الهضرة دوك للي كينتاقدو والناس السلبيين 👌
شحال من واحد دفع للمبادرة وما ستفدش ، كيبقى يقول لك راهم ضلموني أو غا شفارة الخ ..
ومعارفش انه المشكل فيه دافع لهم مشروع لا علاقة ، أو مشروع ديجا محروق ، يعني داك المشروع للي دفعتي لهم ديجا استفدو منو الناس وعطاوه لواحد اخر قبلك. .. يعني انا ايضا بلصتهم منقدرش ندعم مشاريع للي كاينة في المدينة بزااف ، حاول تعطيهم شي مشروع للي مكينش في مدينتك بزاف او مكينش غاع
وتكون عندك فيه خبرة وتقنع لجنة اقسم بالله تا تستافد
عارف انه كاين باك صاحبي ، ولكن للي عندو الكفاءة ايضا كيستافد ،،
انا كنعرف بزاااف دصحابي اقسم بالله ايلا استفدو
ومازال ندير لكم شي نهار شي كونسيبت فيديوهات وغا نبينهم لكم واحد واحد 🥰
تقدر تستافد من 10 د مليون، ولا نجح لك المشروع من حق طلب يزيدو يمولو لك المشروع ومكترد تا ريال ✌️
ولا كانت عندك تعاونية كيعطيوك تال 30 مليون أو اكتر
شركات ومؤسسات ، تال 100 مليون أو اكتر
بالنسبة للدعم كتعطى مطريال ماشي فلوس، كدفع لهم بروجي للي باغي دير وهوما كيشريو ليك داك شي للي بغيتي
✅️المهم اول حاجة المبادرة كدعم ناس لي كتكون حاملة للشواهد بالدرجة الاولى والحمد الله الشباب اكترية عندهم دبلومات (حلاقة، مكانيك، طولي، نجار اي حرفة عندك مزيان) هي كخطوة اولة معندكش ديبلوم سير ديرو واخا دير غا حلاقة 6 اشهر تديه . الا بغيتي تستافد من المباردة
✅️المهم كيفاش كتستافد كتمشي كتمشي لمنصة الشباب د إقليم ديالك للي كتكون في المدينة ديالك ،
معرفتيش فين جات منصة الشباب، شد غا طاكسي يوصلك تال باب المقر ديالهم .
كدخل لمنصة الشباب ، كتلقا موظفين في الاستقبال كتسولهم اي سؤال كيجاوبوك ، هوما تما باش يجاوبوك على كولشي واي حاجة مافهمتيهاش كيفهموها لك
الطريقة التانية :
كتوجه للعمالة ديالك بضبط لقسم العمل الاجتماعي وسول على لي بغا يدفع للمباردة الوطنية كيعطيوك واحد الورقة كتعمرها ب صفة ديالك اي شركة أو تعاونية و كتعمر داك المطبوع..... مرفوق بدراسة الجدوى لمشروعك .
✅️غتقولو ليا حنى ماعرفناش كيفاش نديرو نعمرو هدشي ودراسة الجدوى كيفاش نصوبها كاين الحل . غا تمشي لشي كاتب عمومي او سيبير يقدر يساعدك يصاوب لك دراسة الجدوى احترافية لمشروعك .
باش الدراسة ديال المشروع ديالك يكون مقنع حيت كيدوز امام لجنة مختصة هي لي كتحدد واش المشروع ديالك يتقبل ولا لا يعني واش محتارم اهداف المبادرة الوطنية .
✅️وكنقسم ليكم بالله الا كنعرف ناس دارو مشروع حانوت دهب و مولتو ليهم المبادرة. صاحبي دار باتيسري و جابت ليه المبادرة 25مليون ديال سلعة و قهوة تاني جهزتها لصديقي... يعني كاين مايدار. الملف ديالك كيدفع فعاملة يلا قبلوه كيدعموك و نعود نقولها ماكترجع حتى درهم بالعكس الا المشروع ديالك زاد للقدام عندك الحق كل عامين تزيد طلب الدعم فحدود جوج مرات.
اوا هدشي علاش قدرني الله هاني شرحتو ليك و كنقسم ليك بالله حتى هضرتي صحيحة و عارف اش كنقول فقط خص الصبر و الزعامة والله يسر للجميع سمحو ليا طولت عليكم.
تيقو بيا هد المعلومات شي للي شاركت معاكم غا تقلبو عليها بالفلوس ومغاديش يعطيوها لكم لذلك استغلو الفرصة ودفعو وللي تقبل يرد علينا وللي قبلوه يخدم مع دراري د غروب وشكرا 😊
الناس للي فايت لهم دفعو ديجا للمبادرة او برنماج اخر واستفد من الدعم يبان هنا يفيد ادراري ♥️
انا براسي بغيت ندفع للمبادرة ان شاء الله، وبغيت نشارك معاكم هد الموضوع تا انتوما تستافدو لافامي في اطار احب للناس ما تحب لنفسك♥️✌️
وكاين برامج اخرى كدعم المشاريع الصغيرة أو المتوسطة والكبيرة ، بحال فرصة وانطلاقة واشراقة و 1000 فكرة الخ ..
1March 7, 2026 318
