السلام عليكم ورحمة الله
حياكم الله
- بخصوص المواد وموضوع كسر السلالم، اليوم كنا مع د خالد وطلعنا للامتحانات وحكينا بالأمر واسترسلنا فيه، وصار الكلام كالتالي:
- بداية أول مادة هي التوليد، التقينا بالدكتورة رولا في الامتحانات وهي زارت الكلية للمرة الثالثة كرمال هالمشكلة، فقالت لنا أن السلم مافيه أي مشكلة بعد ما راجعته وأنها ناقشتنا بالأسئلة الخلافية وقالت شو حلها، السلم حاولنا كثير نحصله لكن الدكتورة قالت أنتوا طالعتوه ومشي الحال، وقالت في طالب جايب ٩٨ ونسبة النجاح ٩٧٪ فما في مشكلة بالسلم إنما إذا كان في مشكلة بعلامة الطالب فغالبًا بكون الخطأ تقني لأن صارت بغير مواد، خصوصًا في أول مادة كان في أخطاء تقنية، فقالت لنا اللي متأكد أن علامته فيها خطأ يقدم اعتراض مباشر باسمه ونحن بنعيد تصحيح الاعتراضات يدويًا، والاعتراض مو شكلي فعليًا ورجونا نماذج لمواد وفي نسبة جيدة طلاب طلعلها علامات وطلاب كانت راسبة نجحت، فخلاصة الكلام بخصوص التوليد أننا نقدم اعتراض رسمي كل واحد فينا ليعاد تصحيح أوراقنا.
- أورام وجراحة ٢ كل مدرس كمان طلبت منه العمادة يجي عالكلية ويراجع السلم، وخبروهن للامتحانات أن السلالم مافيها أخطاء، فاليوم أكتر نقاشنا كان عن هالأمر يعني شلون بروح للطالب علامات ونسبة طلاب كبيرة وعلامات لا بأس فيها، وبكون السلم مافيه شيء، والدكتور حسين ما أعطى فرصة ليتناقش بالخلافيات اعتبرها صحيحة متل سلمه وطالما حله خلافي ولكن مو خطأ فما حدا فيو يناقشه بمادته، في نهاية المطاف إذا سلمنا أن الخلافيات هي السبب ما رح تعمل فرق علامة كل هاد، لذلك د خالد أخد سلالم الجراحة والأورام وقال أن رح يطابقها بين النماذج ليتأكد أن كل نموذج بحسب ترتيبه مافيه فرق عن الثاني (لأن المشكلة هي بتصير أوقات)، فللأحد لنشوف شو الترتيبة إِن شاء الله.
📍- للأمانة في كم نقطة لازم ننوه عليها:
- أول شغلة ضروري تعرفوها أن ما لنا مصلحة بأمرين، أننا نروح لطرق غير رسمية للحل قبل ما نكون حاولنا بالطرق الرسمية، وبعدها أننا نقيّد ونمنع طالب من أنه يحاول بعد ما حاولنا نحن وما لقينا فائدة مرجوة، هيك ما بنكون ظلمنا العمادة ولا الطالب، أما المدرس فما حدا بيقدر يظلمه.
- أمر آخر، لازم يكون واضح أننا في الاستمارة لما أخدنا عينات مو لنعترض عن الطلاب اللي سجلت، وإنما نحاول نوجد الخلل إذا كان في السلم أو تقنيًا، بالتالي إذا كان في خلل وخطأ في السلم بيتصحح بدون اعتراض، أما إذا ما رجع الخلل للسلم ما بنقدر نعترض لكل الطلاب دفعة واحدة، وإنما بنعطيهم خبر يروحوا يعترضوا.
- الاعتراض الرسمي في النافذة الواحدة طول هالفترة متاح، وإعادة التصحيح اليدوية فعليًا هي حقيقية وليست شكلية بإذن الله متل ما ذكرنا، وفي حال كان للطالب علامات بترجع وبيسترد رسم الاعتراض والله أعلم كمان.
- يقول أحدهم "لا أكف عن الأمل"، ونحن إن شاء الله لسع ما ملينا من المحاولة، ورح نعمل بشكل جانبي أننا نقدم سلم الجراحة اللي صححنا على أساسه للدكتور خالد بفترة مراجعته للسلالم عسى يرضى يطابق بينهم ونكشف الفرق إذا وجد، والخلافيات بتتقرر على مجموعة التصويت أو بتنحط كهامش خطأ مبدئيًّا ليبين إذا في مشكلة غيرها لازم يبين، واللي بحب يعترض على مادة الجراحة أو الأورام كمان متاح يتوكل على الله.
- نحن مافينا نشكك الطالب بأمر هو حسبه ولقى نفسه مظلوم فيه، وبنفس الوقت مافينا نكذب الدكتور لما يقول أنه راجع السلم متل بالتوليد مثلًا "وفي علامات عالية لهيك السلم مافيه مشكلة" وبعد أكتر من محاولة كمان، لهيك وجهنا للاعتراض اللي هو فيصل بيننا إن شاء الله، هاد بخصوص التوليد.
الخلاصة:
- التوليد بدنا نقدم اعتراضات فردية لكل واحد مننا اللي متأكد من النقص عنده.
- الجراحة والأورام نشوف د خالد ليخبرنا إذا لقى فروق في نماذج السلم أو لا، ولوقتها خطوة تانية.
- وبنكرر نحن طلاب متلكم ورايح لنا علامات في كل المواد، ونحن بصف الطالب وما عم نضرب حدا إبر بنج، كل واحد حر برأيه واعتقاده لكن يفضل نوزن الكلام مزبوط قبل ما نحكيه، والله يتقبل منا ومنكم.
64
2August 20, 2026 1.6K 41 10
