10
(پەرجۆی نووری چاوان و داری حەنانە)
موعجیزەی دووهەم کە ناخ هەژێنە
جگەر برژێن و هەناو سووتێنە
ناڵەی دارێکە لە دووری یارێ
بارانی هەسری لە چاو دەبارێ
وەک لێزمە باران فرمێسکی دەڕژێ
جەرگی سووتاوە و دڵی دەبرژێ
دارێکی خورما بە نێو حەنانە
کە شوێنی تەکیەی پێغەمبەر گیانە
هەر کات کە ویستبای بفەرمێ وتار
پشتی وێدەدا ڕەسووڵی نازدار
تەسمیمیان وابوو گەلی سەحابە
مینبەرێک چاکەن لە بۆ خیتابە
دوای وەی بۆ وتار مینبەر چا کرا
جێ بۆ پێغەمبەر لەوێ داندرا
یەکەمین جار کە ڕەسووڵی سەروەر
لە بۆ خیتابە گەیشتە مینبەر
بیستی ناڵەیەک کە زۆر غەریبە
دارێکە دەگری چەندە عەجیبە
جەرگی بڕاوەو دڵی پڕ ژانە
سووتاوی دەستی دەردی هیجرانە
ئاهی دەروونی وەک کوورەی ئاگر
فیڕاقی یاری کوشتوویە ئاخر
گڕکانی ئەشقە و بڵێسەی ئەوین
لە زامی دووری یاری نازەنین
هەناسەی ساردی وەک زەمهەریرە
بە تۆقی تۆفی ئەوین ئەسیرە
خەزانی دووری لێی بۆتە شەختە
دڵ بۆ ناتۆقێ ؟ گیان چەندە سەختە
بە قەولی سەعدی شاعیر دەڵێ
""""""""""""
بـگـذار تــا بـگـریـم چـون ابـر در بهاران
کـز سـنـگ نـالـه خـیـزد روز وداع یـاران
هـر کـو شـراب فُرقَـت روزی چشیده باشد
دانـد کـه سـخـت بـاشـد قطع امیدواران
بـا سـاربـان بـگویـیـد احـوال آب چشمم
تـا بـر شـتـر نـبـنـدد محمل به روز باران
چـنـدیـن کـه بـرشمردم از ماجرای عشقت
انــدوه دل نـگـفـتـم الـا یـک از هـزاران
""""""""""""""
ئەمیش دەڵێم:::::
دە لێم گەڕێ با بگریم وەکوو هەوری بەهاران
لە بەردیش ناڵە دەردێت ڕۆژی جودایی یاران
پەیکێ شەڕابی هیجران هەر کەس بنۆشێ جارێ
دەزانێ چەندە سەختە دووری لە چاو خوماران
گەر سارەوان ببینێ خوڕەی سێڵاوی چاوم
وشتر بە ڕۆژی هەوری نابا بۆ چۆلەواران
ئەوەندەی من ژماردم لە باس و خواسی ئەشقت
خۆ نەمکوتۆ بە قوڕئان هێستا یەک لە هەزاران
""""""""""""""""
سەحابەش دیتیان زۆر بە عەیانی
ناڵەی حەنانە و شین و گریانی
ئەوجار پێغەمبەر کە دیتی حاڵی
دارێک لە دووری ئاوا دەناڵی
لە سەر مینبەرا ڕاست هاتە خوارێ
ئامێزی پێگرت وەکوو دڵدارێ
باوەشی ئەشق و سرتەی مەعنەوی
دەیلەرزاندەوە ئاسمان و زەوی
هەر خوا دەزانێ کە لەو جێژوانە
پێغەمبەر چی کوت دەگەڵ حەنانە
سارێژ بوو زامی دڵی برژاوی
هاتە ڕاوەستان فرمێسکی چاوی
چەند خۆشە ئاشق بگیرێ ڕێزی
مەعشوق بیکوشێ توند بە ئامێزی
ئەویش مەعشووقت رسول الله بێ
ئەشقت لە ئەشقی عالەم جودا بێ
مەل هەر لە بەر گوڵ شێتی گوڵشەنە
گوڵشەن بە بێ گوڵ شوێنی شیوەنە
منیش عاشقتم وەکوو حەنانە
بۆم وەرە ژوانێ توو ئەو قوڕئانە
گوڵزاری ژینم بێ تۆ قاقڕە
هەڵمی هەناسەم بڵێسەی گڕە
ئەی نووری چاوم لێم بڕاوە هێز
جارێک هەر بە خەو بمگرە ئامێز
هەڵگوردی کوردم دڵداری نێوت
تامەزرۆی شەکر و قەنداوی لێوت
#هەڵگورد_پەسوێ
https://t.me/Barawbakhtawari
