#كيفاش تقدري كطالبة بكالورياا 2027 في أي شعبة انك تتحصلي على #19/20 في مادة #الفسلفة كيما ديت أنا؟بسم الله والصلاة والسلام على رسول الله. أما بعد انا انفال طالبة طب سنة ثالثة متحصلة على بكالوريا 2024 بمعدل 17.89 وعلامة 19/20 في مادة الفلسفة.
قبل كل شيء انا كنت تلميذة كيفكم حكمني خوف شديد منها ومكنتش نعرفها ولا نحبها لدرجة انو في 2023 قلت لبابا فلفسة مشي فلسفة قالي يا بنتي هاذي اسمها متعرفيهاش غدوة فلباك شحال تدي فيها.
● اذا الفلسفة كمادة في عام الباكالوريا خصكم تنحيو عليها اي تصور مهما كان خصوصا التصورات السلبية لأنو طريقة دراستها سهلة ونحسها اسهل مادة تقدرو تتفوقو فيها قبل ما نبدا سلسلة النصائح كاين نقطة لازم نتفقو عليا ⚠️سواءا كنت علمية ام ادبية مكانش حاجة سموها مقترحات تقراي كلش نقولو العلمية ياسيدي عندها رياضيات وفيزيا وعلوم ونتي يا لالة الادبية هادي.مادة اساسية تاعك لازم تقرايها كيما يقرا العلمي العلوم✅️
1️⃣ الأدوات لي وفرتهم لمادة الفلسفة : كراس 96 صفحة باش نحاول فيه وننظم فيه افكاري واوراق بيضاء نتكلمو في ما بعد في واش نسحقوها
2️⃣ كيفاش قريت الفلسفة المرحلة الاولى لي كانت منذ الدخول المدرسي الى غاية اواخر شهر اكتوبر كانت مرحلة جس النبض📉كيفاش؟؟ يعني كنت نروح للقسم نشوف الاستاذة وش تهدر معلومات لي تقدمهم نسيي نفهم هاد الفلسفة وشنوها وش تتطلب مني كتلميذة باش نتميز فيها؟؟ والنتيجة لي خرجت بيها أني ادا كنت حابة نكون تلميذة جيدة هنا لازم نتمكن من المنهجية والاستمرارية والحفظ والمراجعة . اذا كنت حابة التميز لازم المنهجية الاستمرارية الحفظ والمراجعة و#مهارة_التعبير. تقولولي كيفاش نكتسب مهارة التعبير؟ نقولك بالمحاولة والاستمرار على المحاولة وخصوصا قاعدة" اعادة كتابة مقالات لأساتذة ولكن بطريقتي الخاصة" وحتى لو كان التعبير ركيك بالاستمرار يتغير التعبير ويصبح جيد لأنك كل ما ديري تغذية لمخك وانعاش دائم لمكتسباتك من خلال انك تقراي مقالات الاخرين وتشوفي اسلوبهم وتعاودي تكتبيه بأسلوبك هاذا مع الوقت رح يخليك تكتسبي اسلوب خاص بيك✅️
3️⃣ كيفاش كنت نقرا اكاديميا؟ كنت نروح نحضر درسي مثل مثل اي طالب جزائري وكنت نعتمد على شروحات الاستاذة #بهولي_شبيلة على التلقرام ولي مقالاتها جد ممتازة وسهلة للحفظ ومنه يقدر التلميذ يتحصل على 14 او 15 غير من مقالاتها دون اضافات واكيد حسب الاستاذ ادا زيركم تديو 15 ادا كان الاستاذ يصحح عادي توصلو حتى 17✅️💜. والمقالات كنت نحفظهم جدلية وتعلمت منهجية الانتقال من الجدل الى الاستقصاء و منهجية تحليل النص من عند الاستاذ خليل سعيداني.
4️⃣ تقولولي انفال كيفاش كنتي تقراي حتى ديتي 19؟
كنت نحكم اي مقالة قريناها في الدرس نروح نطلع عليها عند الاستاذة بهولي شبيلة نفهمها ونرفد مقالة الاستاذة بهولي ونحط قدامي ورقة وستيلو ونبدا نكتب في الافكار العامة والمداخل الاساسية والاقوال الخاصة بتلك المقالة يعني نحكم المقالة ونرجعها عبارة عن مخطط من صنعي بعد ذلك نحط هاداك المخطط مقابلني ونبدا نحاول نكتب مقالة وحدي انطلاقا من ذاك المخطط وتعبيري الخاص وكي نقلك تعبيري الخاص يعني اي جملة اي موقف يومي اي اية قرءانية تخدم الموضوع اضيفها اي مثال في الحياة الواقعية اضيفه هادا هوا التوسع وهادا هوا الاسلوب هوا التوسع فيما يخدم الموضوع يعني كي تبقاي تخمي اي جملة كلمة تخدم الموضع نحطها . بعدها كنت نرفد مقالاتي ونديهم للاستاذة تاعي تصححلي تع القسم وهاذي نقطة مهمة لازم تديو لأستاذ يصحللكم لانو الاستاذ يكتبلكم بعض نقاط الضعف لي مطرحتولهاش بالكم ومنه تولو تخدمو عليها وتتفاداوها فالمرات القادمة . وفالبكالوريا ايضا حفظت فقط مخططاتي وتوسعت وحدي . بالنسبة لشحال من مرة كنت نحاول انا كنت علمية وقريت قاع المقالات لي فالمنهج وقريناهم فالدرس بالنسبة للمحاولة كنت نديرها خطرة فال 15 يوم او ال 20 يوم.اما الادبيين راها مادة اساسية تعكم اقراو كلش وننصحكم تقراو بدي الطريقة لانو انا حسيتها ممتعة مقارنة بأنك تحكمي مقالة طويييلة وتبقاي تحفظي فيها وغي تحفظيها من تنسايها من . عكس انك تقرايها بمنطق وتكتبيها بأسلوبك الخاص✅️
5️⃣ بالنسبة للبنات لي مشي حابين يكسرو راسهم يحفظو مقالات هادي الاستاذة حرفيا قمة ويديو بيهم
16و 17 عادي جدا✅️
6️⃣ نصيحتي الأخيرة ليكم بنات متفشلوش متفشلوش أنا وحدة مناس فالفصل لول ديت 6 فالفلسفة ومدرت والو من غير اني رحت سقسيت الاستاذة أين الخلل علاش ديت هاد العلامة بوغتون اني نخدم كثر خيرها الاستاذة فهمتني انو المادة جديدة عليا وشرحتلي انو التعبير غير مقنع نوعا ما والتوسع غير كافي لذا خدمت على هاذ النقطتين بحيث وليت نحاول دايمن بالطريقة لي حكيتلكم عليها ومنه اكتسبت اسلوب تعبير خاص بيا وبالنسبة للتوسع اي شيء يخدم الموضوع اضيفه اي شيء يخطر على بالي وتحسنت نقطتي للفصل الثاني الى 14.5 وفي الفصل الثالث الى 16 والباكالوريا الى 19 ✅️
7September 11, 2026 651 37
