و ایندی خیاو شهرینین قیزلاری خیاواندا کوراوغلودان اوخویوب دئییرلر:
غریبین صنمییم، کوراوغلونون نیگاری
نبییه هجر اولوب، دولانمیشام داغلاری.
و بوگون صمد بهرنگینین ده اؤلوم گونودور و اونون «بالاجا قارا بالیغی» تبریزده صحنهدهدیر. او همی اوشاقلارا چوخ اؤنم وئرردی، همی کوراوغلو اونون دا توجه مرکزینده ایدی. بس بو کوراوغلو کیمدی و هارا گئتمیشدی کی بیر داها قاییدیب گلیب شهرلریمیزه؟
کوراوغلو اوسطورهلرده، یئنیجه دوغموش گونشین سیمگهسیدیر. او هر ایل کیچیک چیللهنین سون گئجهسینده دوغوب خالقی قیش و قارانلیقدان قورتارار. ائله محض بونا گؤره، بایرام آیی یا همن بالیق آیینین ایلک بئش گونونه، خالق آراسی، چیلله بئچهسی یا کوراوغلو چیللهسی دئییلیر. کوراوغلو تاریخده ده، خانلار و شاهلارین ظولمونه قارشی عیصیان ائدن قهرماندیر. خالق اینانیشلارینا گؤره، کوراوغلو ائلینی داردا گؤرنده، یئنیدن باش قالدیریب اؤز خالقینی قورویار. نئجه کی یوز ایل اؤنجه، اوتای آذربایجان تزارلارا قارشی عیصیان ائدنده، اوزئییر حاجیبیوف کوراوغلونو باکی شهرینه چاغیردی و کوراوغلو آلیجی قارتال کیمی داغلارین باشیندان قانادلانیب او شهره گلدی و قالدی. ائله قالدی کی یئتمیش ایللیک شوروی دؤنمی ده اونون تاثیری آلتیندا قالدی.
هابئله کوراوغلو بیر کیتاب آدیدیر و او کیتاب سفر- سفردیر و هر بؤلومو بیر سفر آدلانیر؛ اؤرنک اولاراق کوراوغلونون همدان سفری، کوراوغلونون باغداد سفری و ایندی کوراوغلونون تبریز، تیکانتپه، خیاو سفری باشلانیر و یوز ایل اؤنجه اوتای آذربایجانا گلیب قالدیغی کیمی بو سفر ده بوردا قالماغا گلیب. قالماغا و عیصیان بایراغینی قالدایرماغا گلیب. خوش گلدین بییم، خوش گلدین. تبریزه خوش گلدین، تیکانتپهیه خوش گلدین. بیزه خوش گلدین:
بو دره همندیر، بو داغ همندیر
بو دولای، بو دؤنگه، بو یال همندیر.
دونیا، دونیا، قولاغینی توت بری
داغلار، داغلار، کوراوغلودان اوخویور هله...
ابراهیم ساوالان
@aztabriz
41
1
1September 1, 2026 1K 1 2
