_أول مقال فى السلسلة:
"خُد من وقتك خمس دقايق"
أرجوك استثمر شوية وقت في التخطيط قبل ما تبدأ أي مهمة في حياتك .. والله يا جماعة التخطيط ده وإنك تمسك ورقة وقلم قبل ما تبدأ أي حاجة مش رفاهية أبداً
في ناس عندها عقدة من كلمة تخطيط
وأول ما بيسمعوها بيفتكروا انها مهمة العباقرة فقط وان الموضوع معقد جداً عليهم وعايز دكتوراه !
في حين إن الموضوع أسهل مليون مرة مما انت متخيل
إنك تمسك ورقة وقلم وتقعد ٥ دقايق بس قبل ما تبدأ أي مهمة هتعملها وتحدد عناصرها قصادك وتربطهم ببعض وترتبهم ١.. ٢ .. ٣ وتحدد الوقت الزمني لكل خطوة فيهم .. مش محتاج أكتر من كده وهيفرق ١٨٠ درجة في إنتاجيتك وصفاء ذهنك وراحتك النفسية
الكلام ده اتعود تعمله وانت داخل تنام وارسم قصادك كل اللي هتعمله بكره .. واتعود تعمله قبل ما تبدأ أي مهمة في يومك وكأنك بتلعب وبترسم خريطة لنفسك هتمشي عليها
فرق شاسع بين إنك تبدأ أي مهمة والورقة فاضية قصادك وكل عناصرها غامضة وبين إنك تبدأها والخريطة مرسومة قدامك وانت بتعلّم بس على كل خطوة بتخلصها ✅
هما ٥ دقايق
لكن بيوفروا ساعات من التوهان والتشتيت وقلة المزاج
لإن الانتاجية بتتسهل عليك لما بتكون عارف خطوتك الجاية.
⤶ أثـر طـيـب || #سلسلة_التغيير .
