𝐴𝑀𝑅7𝐴𝐽 💚

أحياناً، ما بيكون الماضي ورا ضهرنا…
بيكون قاعد معنا عالطاولة، ساكت، وعم يطلع فينا.

يمكن هيك كانت حمص.

مدينة ما بتتذكّر شوارعها قد ما بتتذكّر مين كان ماشي معك فيها.
ثلاثة شباب، وكم سنة ما كان إلها شكل واضح…
كتاب بين إيدينا، أكل عالسريع، كاسة شاي بنص الليل، فرشة ضيّقة، وضحكة طالعة من التعب أكتر ما هي طالعة من الفرح.

كنا نعيش اليوم لدرجة إنو ما كنا نعرف إنو عم نصنع ذكرى.

وهلق…
واحد منّا صار عنده صورة تخرّج،
والتاني واقف حدّه .. وأنا عم اطلع فيهن وكأنو السنين رجعت فجأة لعند الباب.

فرحان فيكن…مو لأنكن تخرجتوا .. يمكن لأنو كل شي تعبنا عليه سوا وصل أخيراً لمكانه،
حتى الأشياء اللي ما إلها شهادة.

فرحان لأنو شفت بأعينكن شي كنت شوفه من زمان .. بس ما كنت بعرف اسمه.

يمكن كان اسمه «بكرا».

وبكرا إجى…بس مو بنفس الشكل اللي تخيلناه.

إنتو وصلتوا .. وأنا لسا عم أمشي.

بس مين قال إنو الوصول إنو نوصل كلنا بنفس الوقت؟
يمكن بعض الطرق ما بتنقاس بالمسافة…
بتنقاس بالشي اللي بتصير عليه وإنت عم تمشيها.

يمكن في تأخير بيشبه النجاة ..وفي أبواب لو فتحت بوقتها .. كنا دخلناها بأرواح ما كانت تعرف ليش دخلت.

والله وحده بيعرف كم مرة حسبنا حالنا عم نضيع .. بينما كان عم يشيلنا من طريق لطريق،
بهدوء ما بيترك للإنسان إلا إنو يثق.

لهيك…
مبروك إلكن، من قلبي.
ومبروك لكل ليلة نامت علينا بحمص،
لكل رغيف انقسم بيناتنا،
لكل ضحكة ما عرفنا وقتها إنها رح تصير وجع حلو،
ولكل يوم مرق وكنا مفكرينه عادي.

يمكن ما كانت أيام عادية أبداً.

يمكن كانت الحياة…
بس قبل ما نعرف إنها رح تصير ذكرى.

وبين صورة إلكن اليوم وبين الطريق اللي لسا ما خلص إلي .. ضلّ سؤال واحد ما بعرف إذا لازم جاوب عليه…

إذا كان الله هو اللي كتب الطريق من أوله لآخره،
فهل كنا فعلاً متأخرين…
أم إننا كنا نمشي تماماً بالوقت
اللي كان مكتوب إلنا من البداية؟