الليله اموت
الليله آخر ليله
الغيم مد ايده اعله راسي
والمطر شد حيله
الليله گطرات العمُر
ناگوط حَب سهران
يمه ادخيلچ ، اترجاچ
ضميني بسواد الشيله
الليله ليله
هد عليه الليل بخيول الظلاّم
منين اجيبن حيل ويرد خيله
حيرتني ضنوني موتي
اوف نعشي شلون اوصلّه لباب اهلنه
ومن يگابلّني عيله ونشيله
الليله اموت
الليله گلّبي ينام دافي
وتندفن وياه حرارة چيله
الدم ينبع من سراديب الضلوع
ويرسم جروحي عله الفانيله
وطير من بين الضلوع يطير
وتلحگه السهام
وقيس يخسر ليله
وگمر سكران اعله ميز اقمار
ضيع ليله
تفيض روجات الحسافه
وتكسر الشط
يا سنيني الراحيات ، وداعة الله
انطيني بوسه موادع الخل لخليله
يا نخلّ يا عاگر احبل
ضوگ طعم الفاجعه بموتة فسيله
ويصيح يا هور الحزن
لا تغفه يا هور الحزن
تابوتي اجاك ويه الگصب
بهداي حطه اعله الجرف
ومحمداوي من الگلّب غنيله
يا مطر ، ياسيل
ودني اعله نهران الحبيب
بلچي اصادف صورته
شي باقي منه
اثر جدمه اعله الرملّ
واشكيله
وانزع عيوني براحته
وهيه العيون امعلمه شتبچيله
چن ربابة كاولي اتزتني بعتابه
وترگص الغربان عالجثه الثگيله
يا طيور الليل وديني اعله ناسي
اليموت
يشوف ، يسمع ، يلتفت ، ينكسر گلّبه
ويعرف اليبچيله
اتمنه
وعادة الموات يتمنه ويجيله
انا اتمنه
الشته وحضن الحبيب
وسيف چاتلني گبلّ هالليل..
كاظم اسماعيل گاطع
November 15, 2025 2.3K 23
