القصيدة الكاملة... للكبير هاشم العربي هذا الليل وانت بكل حلاتك جيت… — كاظم اسماعيل الكاطع

كاظم اسماعيل الكاطع@Alkatah · 31.2K subscribers Open in TelegramOpen

القصيدة الكاملة... للكبير هاشم العربي

هذا الليل
وانت بكل حلاتك جيت
متنمر عشك شايل خلك صياد
ومحمل قصائد واحنه بأول بيت
ياهو الكالك ماجيت
چا هذا الضوه
شمد جسره صوب البيت
وشصحى الورد
وشفرط الرمان
وياهو الي ترس چف دمعتي جكليت
ياهو الكالك ماجيت
ياغرنوك شعري
وجنحه شايل هور
ياهو الكال اكثر منك تمنيت
افرح يوم .. وازعل يوم
وأمليني بكثر حسنك حزن وهموم
وبتفاحه ارجع بس ارد فرحان
وانا المن عدن عن شوفتك مطرود
واتشهاك
ويهون العطش ياماي
من مريت بيه وناشفه النهران
روبه من الورد
لآخر شبر بأرض الملح مديت
ومن تندهني باسمي بجمرة الحالوب
اصفن هيچ واصفن هيچ
واسأل اسمي
عند يا شاعر تحليت
احس اسمي لذيذ بشفتك والله
حتى استغرب اسمي لو علي ناديت
انت هناك .. بس هنا
وصح ماجيت .. لكن جيت

t.me/Alkatah/38499 Translate