معز المؤمنين
الحسن اول شهيد بواقعة عاشور
بدليل اول ممهد للطف اترشح
لمن كال لا يوم كيوم حسين
منها الطف تحول للذبح مسرح
كريم العتره عزَّب بالطف بجسام
من شاف الزلم بيهم الموقف شح
الحسن أسس مباني فلسفة عاشور
ثوره وترجماها حسين بالمذبح
واسه حسين بسهام النعش من مات
نفس اسهام صدره جروحهن تطفح
اذا عنه كريم نكول شنهو انضيف ؟
مرات اليذمه بصيغة اليمدح
معز المؤمنين بوكت كله اذلال
والقائد الشرعي الناصع الأصلح
قائد ثوره لكن مو شرط بالسيف
الحليم بصبره وكت الشده يتسلح
احيانا الأمه التجبر المعصوم
يرجع عن خيار المعركه ويصفح
لذلك بالصلح جان الحسن مجبور
لأن يعرف بعد بالثوره ما تنجح
من تتقاعس الأمه بعد معلوم
ثوره بدون جرة سيف ما تصلح
ما عادت بعد تنهض الأمه ابدور
بين الذله والخذلان تتأرجح
اصابع آل اميه الكاها موجودات
كلما اقره بالتاريخ واتصفح
يسمونه الثري اليبحث عن الزيجات
الكلش منفتح بس للترف يطمح
نعم هذا الحسن كلما اجي واقراه
اشوف افكاري من جديد تتفتح
اشوفنه الوقور السمح راعي الطيب
وأبو كلب الجبير الأبد ما يجرح
اتيه بعالمه كلما اصدن ليه
بدليل بلا شعور افكاري بيه تسرح
وابدي اقراه عكس ما كاتب التاريخ
واشاهد منجزاته اكبالي تتوضح
لوما حكمته وتدبيره الطف ضاع
ما يحتاج نمشي انحلل ونشرح
الحسن اسس مباني فلسفة عاشور
ثوره وترجماها حسين بالمذبح
٢٠٢٥ م
#علي_منديل
#استشهاد_الإمام_الحسن ع
6July 21, 2026 160
