زينب اجت ليكم يهاليها.
شوفها شنهو البيها ما بيها
فوگ الگبور ادور. حرمه وگلب مكسور
//
اجت متروسه ضيم واه. وگلبها معطب من الهم
الحمام الما يعرف ينوح..يجي من عدها يتعلم
كل رمله سحگها حسين..عد زينب عطر تنشم
ودها تلم تراب الطف.........لچن اهوايه ما يلم
فوگ الگبر فرشت مأسيها.
.رادت اخو منكم يحاچيها
عافتكم بعاشور....حرمة وگلب مكسور
//
طاحت فوگ گبر حسين...تنگع اترابه دمعتها
گلبها يفيض حنية......اخت مشتاگه لخوتها
خلت عاالگبر چفها....وبدت تحچيله قصتها
غريبه وراجعه من الشام...وتشيب الراس غربتها
شتحچي العقيله اجروحها اهوايه
كسرت گلبها طيحت الرايه
ضل الها بس گبور. حرمة وگلب مكسور
//
اجتكم.حيل مهظومه .. وأتريد اليهودها
شبعانه يسر وفراگ. يهلها الله يساعدها
يخواني انه زينب. ها الچلمه ترددها
تريد اليسأل عليها. وتريد اليناشدها
من الغرب ردت يولياهه.
.لكن رقيه ماجت اوياهه
منها الدمع منثور....حرمة وگلب مكسور
//
صارت چن حمامه ادور...فوگ اكبوركم هيه
لو عدلين يخوتها.. ..ماودوها مسبيه
وگفت يم گبر.عباس. چنها هلال محنيه
تنشد عاالعلم وينه. أوين اچفوف راعيه
يم الگبر تسمع بواچيها
عباس وينك ما تحاچيها
عيلتها چنها اطيور...حرمة وگلب مكسور
//
چم ذكرى الها برض الطف..ضلت عايشه وياهه
لمن عاينت للتل...مدري وين وداهه
ذكرت ساعه العاشر. وحيرتها بيتاماهه
اهلها والخيم والنار....هاي شلون تنساهه
وكفتها عاالتل صعبه هاالذكره
مذبوح اخوها وهيه تنتظره
من القفى منحور.....حرمة وگلب مكسور
(((الشاعر سعد العبودي)))
1July 31, 2026 117
