حماسية للحسن ع
الشاعر قاسم الساعدي المندلاوي
***
چبدة مصيوبة ابسهم واخرى بالسم والألم
اثنينهن من فعل امية تندب الزهرة الزچية
***
چبد ابو محمد ضَهَد حيلي ضَهِد
وچبد ابو الأكبر مَرَد گلبي مَــرد
ياهو اليواسيني بمصاب الوِلِـــد
عالحسن لمّن أنوح بيّه لمصابه جروح
وعالحسين ابهالرزية تندب الزهرة الزچية
****
مَرّة يم المجتبى يوم العــــــــزاء
ومَرّة يم حسين بالطف البُكـــــاء
امن الضلع للحين تنزف هالدماء
صرت مگصد للدموع من هوَت هاي الشموع
عصرتي ردّت عليّه تندب الزهرة الزچية
*
أبني لَكبر گرّة اعيوني الحســـن
ابغدر جعدة الظالمة شفته انطعن
أبد ما ينجب بَديله هالزمـــــــــن
عِلِم رب العالمين عنده من جدّه الأمين
اگبالي كل صبح مسية تندب الزهرة الزچية
*
جرّعوه سم الخيانة ابهالعمـر
كاس يتبع كاس من كثر الغدر
رادوا ايسَلمونه وبحالة أســر
للطلع عن الشرع للمُحرّم يتّبع
أخذته مني المنية تندب الزهرة الزچية
***
حقّه يعقوب العمآ فگد الأبـــن
منه راح الشوفته عمره يحـن
حزني ما يوصلّه بالدنيه حزن
حِزن هالكون الفسيح ابشوفته الحزني يطيح
أنحَب بعبرة شجية تندب الزهرة الزچية
July 21, 2026 160 1
