#نعـي
إلى الإمام العسكري عليه السلام
ناح المهدي وشتدت حسرته
وابوي العسكري يگلهم فكدته
نعشه للكبر يا ناس شلته
وابوي الغالي بجفوفي دفنته
مالوم الكلب هليله مالوم
مات العسكري يا ناس مسموم
المهدي غسله والحيل مهدوم
وعينه امن الحزن ما شافت النوم
عكب العسكري حيرتنه حيره
وكسرنه اصبحت كسره جبيره
طبع بالمات تحضرله العشيره
اشلون المات بله بغير ديره
لو راح الابو وطول رحيله
من بعده الحمل ياهو اليشيله
يبجي المهدي والحسره بدليله
راح الماكو بالدنيه مثيله
سالت دمعته بليل المنيه
وتذكر غريب الغاضريه
من سحكت بصدره الاعوجيه
وبالطف جثته ضلت رميه
ثلث تيام جده حسين عريان
وبالطف انذبح يا ناس عطشان
لعبت فوك صدره الخيل ميدان
ومن حر الشمس تدرون ذبلان
جسمه بلايه راس وتجري الدموم
ويه المحبس امسلبين الهدوم
وزينب بالخيم صاحت يمظلوم
كوم الحك علينه هجمت الكوم
الشاعر
تحسين الخفاجي
#اللهم_عجل_لوليك_الفرج
2August 20, 2026 607 40
