"ما يعيب الرجل إلا جيبه"
أعرف أكون غريبة لمن
أگلچ لا تخلين الفلوس تغرچ
بس صدگيني مو كُل رجُل
عنده فلوس هو "رجُل".
إنتي صغيرة وگلبچ نظيف
تحلمين بحياة حلوة
بيت، سيارة، سفرات، هدايا
وما غلط من حقچ
بس مو على حساب كرامتچ!
أكو ناس قنعتنا وفهمتنا انو
"الرجل ما يعيبه غير جيبه"
وگلبوا الموازين،
وصار كلشي بالدنيا يُقاس بالمصروف
ونسوا إن الرجولة مو بورقة نقدية
الرجولة تربية ودين وضمير
الرجُل الحقيقي هو الي يخاف الله بيچ
يحترمچ ، يصونچ، ما يهينچ،
ما يرفع صوته عليچ
وما يگدر ينام وإنتي زعلانة منة
إنتي تستاهلين رجل يشوفچ نعمة
مو عبء .
والله لو الجيب المليان يسوّي رجُل
چان أغنى أغنياء العالم ما يخونون
نسوانهم ولا يكسرون قلوب
ولا يهينون بالفلوس.
إنتي لا تغنرين ولا تسمحين
لأحد يضحك عليچ بـ "جيب مليان"
وقلب فاضي
واختاري إنسان يخاف ربه
ويحافظ عليچ
لأن الفلوس ممكن تروح الي حيبقى
هو الوَد والرحَمة الي بينكم
وللأمهات أگول
إذا إنتِ ربيتي إبنچ على إنو
الرجولة بـ الجيب
فـ لا تستغربين إذا كبر وگام يهين
ويكسر ويتفاخر بفلوسه بس
الولد لازم يتعلم من صغره
شنو معنة "رجُل"
يتعلم يحتَرِم، يسمَع، يعذر، يتحمّل
مو بس يتعلم شلون يصرف
ويتفاخر بفلوسة وصرفة
علميه إنو المرأة مو درجة أقل
منة ومو لعبة بيده
مو حجاية يتسلى بيها ويمل منها
علميه يخاف الله
قبل لا يخاف من الناس
ولا تنسين بنتچ،
علميها إنو الرجل ما يقاس
بعَدد الفلوس الـ بجيبه
البنية إذا ما كبرت وهي سامعة من
أمها "الكرامة أهم من كل شي"،
راح تكبر وتصدگ إن الهدايا تعني حب
وتسكت على الإهانة لأن وراها اكو
وردة
فـ يا أم، يا قلب، يا مدرسة
علمي إبنج، وعلمي بنتچ
لأن التربية الصح هي الأساس
وإحنا اللي راح نغيّر جيل كامل
مو بشعارات،
بـ مواقف، بـ مبادئ، وبـ ضمير 💗 .
@x_ayo1
June 1, 2025 233 3
