В. А. Вонгродскай аатынан Дьокуускайдааҕы медицинскэй колледж Үөһээ Бүлүүтээҕи филиалын бастакы куурсун устудьуоннарын чиэстээһин үөрүүлээх тэрээһинэ ыытылынна.
Быйыл В. А. Вонгродскай аатынан Дьокуускайдааҕы медицинскэй колледж Үөһээ Бүлүүтээҕи филиала иккис сылын аанын арыйда. Быйылгы устудьуоннар колледж 120 сылын бэлиэтиир үбүлүөйдээх, олус суолталаах сылыгар киирдилэр. Бу үөрэх сылыгар "Сестринское дело" диэн хайысханан биһиги улууспутуттан барыта 21 устудьуон бастакы кууруска үөрэххэ киирдилэр.
Бастакы курс устудьуоннарын эҕэрдэлии колледж директора, медицинэ билимин кандидата, Российскай Федерация үөрэхтээһиҥҥэ уонна иитиигэ бочуоттаах үлэһитэ, Россия Үтүөлээх бырааһа Дмитрий Афанасьевич Алексеев кэллэ. Дмитрий Афанасьевич эҕэрдэ тылын Ил Дархаммыт Айсен Сергеевич Николаев күн күбэй Ийэтэ Тамара Сергеевна устудьуоннарга тиэрдибит үтүө тылларыттан, эҕэрдэтиттэн саҕалаата уонна устудьуоннарга үөрэхтэригэр кыһамньылаах сыһыаны уонна төрөөбүт дойдуларыгар туһалаах дьон буолан тахсалларын баҕарда.
Билигин биһиги улууспутугар 3 орто үөрэх кыһата үлэлиир. Ол курдук Үөһээ Бүлүүтээҕи техникум, былырыын арыллыбыт Дьокуускайдааҕы медицинскэй колледж филиала уонна быйыл саҥа арыллыбыт Дьокуускайдааҕы педагогическай колледж филиала. Бу икки Сахабыт Сирин сүрүн колледжтарын салааларын улууспутугар арыйыы биһиги Ил Дархаммыт Айсен Сергеевич Николаев быһаччы өйөбүлүнэн олоххо киирдэ. Колледжтар арылланнар, медицинэ уонна үөрэҕэрии эйгэтигэр биһиги дьоммут төрөөбүт дойдуларыттан ырааппакка, анал идэни ылар үөрэхтэргэ киирэр кыахтаннылар.
Санатан этэр буоллахха, былырыын Дьокуускайдааҕы медицинскэй колледж Үөһээ Бүлүүтээҕи салаатыгар 60 устудьуон фельдшер уонна медицинскэй сестра идэтигэр киирбиттэрэ. Ол аата биһиги улууспутугар билигин номнуо 80-тан тахса медицинэ үөрэхтээх инники каадырдарбыт үөрэнэ сылдьаллар. Үөрэхтэрин бүтэрбит медицинэ специалистара нэһилиэктэринэн фельдшер, медсестра идэтигэр үлэлиэхтэрэ, медицина каадырдарыгар баар кыһалҕабытын быһаарарга улахан көмө буолуохтара диэн биһиги ис сүрэхтэн эрэллээхпит.
Бүгүн саҥа үөрэх сылын саҕалаан эрэр устудьуоннары ис сүрэхтэн эҕэрдэлиибит! Үөрэххитин ситиһиилээхтик бүтэрэн, дириҥ билиини ылан, төрөөбүт улуускутугар уонна Сахабыт Сиригэр туһалаах, үтүө санаалаах эмчиттэр буолан тахсаарын. Барыгытыгар ситиһиилээх үөрэх сылын, чэгиэн доруобуйаны, үтүө санааны баҕарабын!
#ҮөһээБүлүү
#ЯкутскийМедицинскийКолледж
max.ru/channel_VNikolaev
Forwarded fromВалерий Николаев
4
1September 9, 2026 270
