كثرانه هاي الفيديوات هالايام
نسوان تتطارح وية بقية السيارات بالشارع وتصور نفسهه وتنزّل
بعضهن عالخط السريع ووية الاوبامات
لا طريقة لزمة السكان صحيحة
لا طريقة التجاوز عاليمين صحيحة
لا طريقة عرض الفيديو كانجاز صحيحة
لا طريقة التعاطي وية ذني المستخفات صحيحة
جنا حايرين شلون نسولف وية اهل الدراجات اللي يفلقون بنص الشارع
هسه حايرين بيهم وبالبنات الخفيفات اللي يلهثن عالتفاعل واللايك ولو على سبيل تشويه المجتمع كله فوك ما ملعوب بخلقته
ينراد نراجع مفهوم المنجز
الرعونية مو منجز
الخطأ مو منجز
الجرأة الوقحة مو منجز
الاختلاف عن الاخرين بحد ذاته مو منجز
المنجز قد يكون ان لا تظهر للملأ
وقد يتطلب الظهور الحسن والقدوة
لازم نرجع خطوة ونعرّف العيب والخطأ والزين والمو زين والحرام والمناسب والنشاز .. حتى لا نضيع بتشوّه واختلاط المفاهيم اللي جاي يمارس بشكل عملي بمواقع التواصل ..
تعلي صوتك بنص الشارع عالوادم انت نشاز
مو قوي
تتجاوز عالقانون المروري انت غلطان
مو سبع
تتزابك بين السيارات .. ممكن تكتل طفل او رجل كبير
ومحد يعذرك بوقتهه
تريد تثبت ذاتك وتشعر بقيمتك .. روح اتعب ع نفسك علميا وعمليا وحتى دينيا ..
#اجتهاد
20
5
1September 1, 2026 402
