هيه الأم مو دائما ضحي ومو دائما هي المذنبة
من أكثر الأخطاء اللي نسويها بالمجتمع من نسمع قصة بيها أم وأولاد نقرر النتيجه قبل لا نعرف التفاصيل مالتها
إذا الأم تعبت نكول خطية ضحت بحياتها علمود أولادها
وإذا الأم غلطت نكول تبقه أم لازم نتحملها
بس الحقيقة مو بهالبساطة
الأم إنسانة قبل لا تكون أم
ممكن تكون تعبت انظلمت تحملت فوق طاقتها وضحت بأشياء هواي حتى تحافظ على بيتها وأولاده ومن حقها أحد يشوف تعبها ويقدره
لكن الأمومة مو فد صك براءة
الأم ممكن تظلم ولدها وهي تظن أنها تحميه
و همين ممكن تفرق بين أولادها
ممكن تستخدم التضحية حته تذكّرهم طول عمرهم بفضلها.
ممكن تدخل بحياة أولادها بشكل يخنگهم لو تتحكم باختياراتهم أو تبرر أخطاءها بحجة أني أمكم وأعرف مصلحتكم
وهنا لازم نكون منصفين
مرات الأم تكون ضحية لزوج ظالم ولظروف قاسية ولمجتمع ما رحمها بس هيه بنفس الوكت ممكن تتحول من دون ما تنتبه لشخص يأذي أولاده
ومرات الولد يكون جاحد فعلا وما يقدّر تعب أمه
لو يكون الولد متأذي منها بس يخاف يحچي لأن المجتمع راح يعتبره عاق بمجرد ما ينتقدها
وهذا هو الفرق بين احترام الأم وبين تقديسها
احترام الأم واجب بس احترامها مو لازم يعني إنكار أخطائها
والاعتراف بأخطائها ما يعني عقوقها
إذا جانت الأم مظلومة نوكف وياها اكيد
وإذا جانت ظالمة نوكف ضد الظلم طبعا
وإذا كان الولد غلطان ما نبررفله لأن أمه غلطت قبله
وإذا جان الولد مظلوم ما نطالبه بالسكوت فقط لأن الشخص اللي ظلمه هو أمه
العدل الحقيقي يبدي منا
لا تنصر الأم لأنها أم ولا تنصر الولد لأنه ولد
انصر الحق لأنّه حق
لأن العائلة ما تحتاج شخص دائما ينتصر لشخص
تحتاج شخص يعرف شوكت يتعاطف وشوكت يعترض
وهذا الكلام ينطبق على الأب هم وعلى الابن والبنت والزوج والزوجة
المحبة شي والحق شي آخر
2
1September 2, 2026 27
