🗣️ Mutolaa
Ҳаётий воқеалар
Учинчи ҳикоя
Қувғин ва имон
Масиҳийлар ўз имони учун қувғин қилинган давр эди. Бир куни бизнинг жамоатимиз Давлат махсус хизматлари ходимлари томонидан қўлга олиниб, ИИБга олиб борилди. У ерда бизни алоҳида-алоҳида хоналарга олиб кириб, сўроқ қила бошлашди ва турли ҳужжатларга имзо қўйишга мажбурлашди.
Мен ҳам шундай хоналарнинг бирида сўроқ қилинаётган эдим. Қаршимда уч нафар махсус хизмат ходими ўтирарди. Улардан бири Муқаддас Китоб ҳақида, иккинчиси эса ҳаётим ҳақида турли саволлар берар, учинчиси эса жавобларимни диққат билан кузатиб турарди.
Суҳбат қарийб 5–6 соат давом этди. Бу вақт давомида жуда кўп воқеалар юз берди. Ходимлардан бири менга нисбатан яхши муносабатда бўлса, бошқаси босим ўтказар, ҳақорат қилар ва ҳужжатларга имзо қўйишга мажбурларди. Аммо мен улар кўрсатган ҳужжатларга имзо қўймаганимдан кейин, мажбурлашнинг фойдасиз эканини тушунишди.
Шундан сўнг, сўроқ бошланганидан бери менинг ҳаракатларимни диққат билан кузатиб турган ходим менга яқинлашиб, бошқа бир жамоат билан содир бўлган воқеани айтиб берди.
Ўша даврда нафақат масиҳийлар, балки турли диний радикал оқимлар ҳам давлат махсус хизматлари томонидан қаттиқ назорат қилинар эди. У ходим бир куни улар бошқа бир жамоатни ҳам қўлга олганини айтди. Ўша жамоатнинг асосий хизматчиси махсус хизмат ходимларидан жамоат аъзоларини қўйиб юборишларини, унинг ўзига эса хоҳлаганларини қилишлари мумкинлигини сўраб, уларни ҳимоя қилган экан.
Ходимнинг айтишича, бошқа кўплаб радикал диний оқимлар қўлга олинганида эса, уларнинг етакчилари одатда бундай йўл тутмас экан. Ҳатто бир неча ой олдин бир шахс ўзини оқлаб бериш ва бошқа ҳаммаслакларининг исмларини айтиб бериш эвазига озод қилинишини сўраган экан.
Шунда ўша ходим менга яқин келиб:
— Сизлар, масиҳийлар, менга жуда ёқасизлар. Лекин сизларнинг Хушхабарни айтишингиз ва жамоат биносидан ташқарида Муқаддас Китобни ўргатишингиз бизни хавотирга солади. Илтимос, бизни бунчалик овора қилманглар. Биз жуда бандмиз. Сизлар ўқиётган Китоб давлатга бўйсуниш ҳақида бир неча бор таълим беришини биз биламиз. Лекин сизлардан ташқари давлатимизга қарши бўлган бошқа гуруҳлар ҳам бор ва биз улар билан боғлиқ ишларга жуда кўп куч ва вақтимизни сарфлаймиз. Бизни тушунасизлар, деб умид қиламан, — деди.
Шундан кейин у хонадан чиқиб кетди.
Жамоатимизни тушдан кейин, тахминан соат 4 ларда қўлга олишган эди. Бизларни эса ўша куни ярим тундан кейин, соат 2 ларда уйларимизга қўйиб юборишди.
Уйга қайтаётганимизда, йўл бўйи бир-биримиз билан ичкарида бошимиздан кечирган воқеаларни гаплашиб бордик. Ҳар биримиз ўша кунни турлича бошдан кечирган бўлсак-да, бир нарса аниқ эди: бу қувғин жамоатимизнинг имонида янада мустаҳкамланишига сабаб бўлди.
Чунки ўша оғир вазиятда кўпчилигимиз Худонинг кучли қўлини ва Ўз фарзандларини қандай асрашини яққол кўрдик. Бу воқеа бизга қувғинлар имонимизни йўқ қилиш учун эмас, балки баъзан имонимизни янада мустаҳкамлаш учун хизмат қилишини кўрсатди.
Матто хушхабари 5:43-44(МЁССТ)
оятлар шундай дейди:
Сизлар: “Ўз яқинингни севгин, душманингдан эса нафратлангин”, – дейилганини эшитгансизлар. Аммо Мен сизларга айтаман, душманларингни севинглар, сизларни лаънатлаётганларни дуо қилинглар, сизлардан нафратланаётганларга яхшилик қилинглар, сизларни ҳақоратлаб қувғин қилаётганлар учун ибодат қилинглар.
Худо ҳаммамизга ёр бўлсин!
